Shillong: Ka jingialang jong ka Executive Committee ka Dorbar Shnong Malki kaba la long ha ka 07tarik Nailur 2018 ha iing dorbar shnong ka la shim katto katne tylli ki rai na ka bynta ka jingtip paidbah haryngkat ka jingmaham khnang ban lah ban teh lakam ia ki jingsniew ha shnong.
Ka jingialang ka dorbar shnong ka la shim lai tylli ki rai ha kaba yn ym shah shuh iano iano ban shong kai ha ki bynta jong ka surok khlaw la ka long mynsngi ne mynmiet.
La mana ba ym dei ban shongkai ha ki surok shnong ne foot-path, khamtam ha ki por ba la dum bad ban ym leh kino kino ki kam kiba lah ban pynjah burom ia ka shnong Malki.
Yn ym shah ban shong kai ha ki kali la jong ha ki jaka surok paidbah khnang ban lait na ka jingshah kynnoh ba phi dei ki nong pynshlur ia ki jingsniew.
Ha kajuh ka por ka dorbar shnong ka la pyntip ba lada don kino kino kiba leh pyrshah ia kaba la maham, ka dorbar shnong bad ki paidbah kin pyntip beit sha ki pulit.