Shillong: 
Hadien 5 sngi ba u la risaiñ na ka seng Congress, dei mynta ka sngi ba ki nongthohkhubor ki la ioh ban ia kynduh ia u bah D.D Lapang ban ia kren markhmat bad u bad katei ka jingiakynduh ka long ha Nongpoh. Ha katei ka jingiakynduh u bah Lapang, u la iathuh ba u la don hapoh ka seng Congress la 45 snem bad ka jingjied jong u ban leit sha ka seng Congress ha katei ka por ka dei, namar ka jingsngewburom ba ka dei katei ka seng kaba la pynioh laitluid ia ka ri India bad katei ka seng ka don ia ki nongialam kiba jrong ka rynieng kum u Pandit Jawaharlal Nehru, u Rajiv Gandhi, ka Indira Gandhi bad kiwei.
U bah Lapang u la ong ba ha ka jingdon jong u hapoh ka seng Congress u la ioh ban ia treilang bad u Rajiv Gandhi, ka Indira Gandhi, u Narasimha Rao, Dr.Manmohan Singh nangta sa bad ka Sonia Gandhi, “Ka madam Sonia ka dei ka briew kaba nga burom eh, ka kup ia ka durkmie ha nga bad ka long kum ka nongpeit nongsumar bad ka da lehbha khamtam ia ka thaiñ shatei Lam mihngi” u la ong. “Hynrei haba kylla ki nongialam ka don ka jingsngewpher bad kaba ktah eh ia nga ka dei ka jingong jong u Rahul Gandhi u President ka AICC ha kaba u ong ba ki briew kiba la tymmen ki dei ban mih noh na ka seng Congress, dei halor kata ka nongrim ba bun ki radbah ki la shah weng lut, kiba bun ki riew rangbah kum u Digvijay Singh, ka Ambika Soni, Janardhan Dwivedi, u Sushil Kumar Shinde ba ki mih noh na ka Congress”, ong biang u bah Lapang.
Haba phai pat sha ka jingshah ibeiñ jong u namar ka jinglong tymmen u la ong , “Ha ka por elekshon nga la trei shitom bad katkum ka jingkheiñ jong nga ngin ioh beit ia u nombar ban thaw sorkar, hynrei u Rahul u ong ia nga ban pynkut noh ia ka jinglong President. Nga ong balei phim ap sa tang katto katne sngi ban thep vote naba nga la pynbeit lut nadong shadong ia ki lynti ba dei ban iaid, nga la kyrpad ban ailad haduh ban da dep elekshon, hynrei u ong em um ap shuh” ong u bah Lapang.
“Nga dang kwah ban shakri hynrei ka AICC ka klet noh ba u politishian um ju don tarik ban shong penshon, ngam shym ialeh ia ka elekshon ba nga iohi ba ki lah ibeiñ bad ym i don jaka shuh ha ka AICC ia ki tymmen ba la phuh ñiuhlieh, nga la sei da u Mayrald Born, ngam leh phoi, ngam leh mynleh, ngam shym pynat hynrei nga da trei shitom radbah ban pynjop ia u. Peit ha ki rikod jong ka AICC, ki briew kiba la 95 snem karta ruh ki long Myntri rangbah bad ki dei ki MR kiba tbit” u la ong.
U la bteng biang da kaba ong “Hynrei kine ki briew ki kwah ban phah shongkhop ia nga, da kine ban ong ia nga shongkhop ban ong mem dei shuh ban bteng kum u President, nga mih noh syndon, haba nga mih ngam iathuh hano hano ruh, ha u Mayrald u MLA ruh ngam iathuh, ngam kwah ban kanbas ban pyntip briew, ban pynshoi briew , ngam kwah pynshit iano iano ruh, hynrei ki bun ki ong ban ia mih lang, nga ong ia ki ba ngam ju pynshit ka shong ha ki, shuwa ia nga ki mih uwei hadien uwei hynrei ym dei ba nga khynniat ma nga ne ba nga khroh ma nga” u la ong.
U la iathuh ba mar ia risaiñ shibun ki jingkyrpad na ki nongialam Congress ka la wan ba ngan weng noh ia ka shithi risaiñ, “Ha Delhi kiba bun kiba wan kyrpad, u Rahul u kwah ia kren u ong ba lada donkam ban wan sha Meghalaya ruh un wan, ka Madam Sonia ruh ka kwah eh ban ia kren, u Mukul u la wan ban shong shi kynta bad nga, hynrei nga la ong ba ngam lah shah shuh ia kine ki jingleh kiba la slem bah, bad mynta ka la dei ka por ba ngan ong Khublei ngam wan phai shuh” ong u bah D.D Lapang.
Haba kylli shano mynta un leit ne sha kano ka Party un leit iasoh u la ong “Ki kylli ia nga katno ngut ki ban wan na ka Congress, nga ong ba nga khlem ong iano iano ruh, wat ia u MLA ka nongpoh ruh u sah ha ka lyngngoh, shano ngan leit ngam pat tip, ngam pat wer briew, nga kwah ba haba treikam yn ym don shuh ba teh na kti jong nga, nga la phong ia ki juti jong ka jingduk bad tang uba phong uba sngewthuh ia u prek uba thar, nga kwah ban shakri ia u paidbah haba ki ong wat shakri ngam mynjur wat ha jingthiah pang ruh ngan dang bteng ia ka jingshakri jong nga, kino kino kiba iahap jingmut bad nga ngan leit shata bad ki lah ban wan lang bad nga. Ki kwah ia kynduh ki Faleiro kiei kiei nga ong ym don jingmut ban wan ia kynduh ia nga naba shisien ba nga la rai ngan ym phaidien shuh” ong u bah Lapang ha ka jingiakren bad ki nongthohkhubor.
Shuwa ban pynkut ia ka jingiakren bad ki nongthohkhubor u bah Lapang u la ong “Nga la len lade ha kiba bun ki khep, nga la long myntri rangbah san sien, ngi ia shrut para ma ngi. Ha ka sien kaba khadduh eh ka Madam Sonia ka la khot ia nga ha ka kamra ba 70 jong ka Pinewood Hotel ka la kylli ia nga, ka ong ban long myntri rangbah bad ha katei ka elekshon ka Congress ka ioh 16 ngut ki MLA na Khasi-Jaintia bad 14 ngut na Garo. Nga ong ia ka Madam utei u Mukul ruh uba kwah eh ban long myntri rangbah u kwah dik dik ban long long MR, nga ong ai ia utei namar da um ioh kan pra, ka Madam ka shu sngap khlem kren” ong u ba Lapang.