Shillong: Ka All Meghalaya Kickboxing Association (AMKA) ka la wan iing ryngkat 9 tylli ki takma ba la ioh khur na ka rynsan ialehkai National Kickboxing Championship 2019 (24th Senior, 23rd Junior & 23rd Sub-Junior), kaba la kut dangshen ha Goa.
Kine ki kynthup ia u Johnny Ryntathiang (Senior K-1 60 kg) bad u Shaiborlang Lyngdoh (Sub-Junior Semi Contact 40 kg), kiba la khur ia ka takma ksiar. Kiba la khur ia ka takma rupa ki kynthup ia u Peterson Rapsang (Senior Light Contact 51 kg), ka Inesgabahun Dkhar (Senior K-1 51 kg) bad ka Ibahaundaris K. Syiemlieh (senior K-1 57kg).
Ia ki takma rnong la khur da ka Phidashisha Suting (Sub-Junior Semi Contact 44kg), ka Ibandalin Slong (Junior Light Contact 43 Kg), u Kerrymarchborn Dkhar (Senior Full Contact 51 Kg) bad u Rickynelson Sohtun (Senior Light Contact 51 Kg).
Haba iakren bad ki nongthoh khubor ha ka lah sngi U Blei, u President ka synjuk u samla Samuel Hashah u la pynpaw ia ka mynsiem ka jingkmen ba watla ka AMKA ka la phah 14 ngut ki nongialehkai, hynrei kaba sngew tynnad ka long ba 9 ngut ki la wanrah burom ia ka Jylla hi baroh kawei.