Ha ka jingialap elekshon mynta ka sngi, U Rahul Gandhi, u kren shai ba ka Congress, kan pynhap noh ia ka sorkar BJP ha Madhya Pradesh. Ha kajuh ka por, U Gandhi, u byrngem ruh ia ki nongialam jong ka seng Congress, ba kin shah pynshitom da kaba tyngeh, lada kim ia kynduh ia ki nongtrei jong katei ka seng.
“Mano mano ban long myntri lane myntri rangbah bad lada ka jingkhang iing jongki, kam plie rynghang na ka bynta ki nongtrei jong ka seng Congress, kumta uta u myntri lane u myntri rangbah, un hap noh na ka shuki jongu, tang hapoh ka 15 minit” ong U Rahul Gandhi. “Phi la ai ia ka snam bad ka syep jongphi bad kumta ka dei ka jing bah khlieh jongnga ban peit ba phin ioh jingmyntoi na ka sorkar” ong shuh U Gandhi.
“Agar neta aapke beech nahi rahega to wo neta nahi rahege (u nongialam, u bym don por ban iakren bad phi, un nym long sah u nongialam)” ong shuh U Rahul, ha kaba pynbna ruh ia ki tiket jong ki kandidet, ki ban iakhun ha katei ka elekshon ha Madhya Pradesh.
U Rahul, ula kular ruh ban map ram ia ki nongrep, ha kaba ula ong ba un nym sngap satia ia kino kino ki jingkren jong ki stad ki nang bad u ong “Haba ki heh spah kim siew ram sha ka sorkar, la ai da ka kyrteng kaba sngew tynnad bha ka Non Performing Assets (NPA) bad ki lah ruh ban iaid ban ieng katba ki mon, hynrei haba u nongrep, um lah ban siew ia ka ram kaba T.5hajar, ula shah khot u bym siew ram bad u nongtuh” ong shuh U Rahul.