5 ngut kiba pan tiket MDC Congress, na Nongshken Konstitwensi

Shillong,18 Nohprah:
Ka elekshon MDC 2014 ka la sdang beh lyer ha ki thain Ri-War, bad haduh ka sngi kaba kut ka jingkhot aplikeshon na ka bynta ki kyrtong kiba kwah ban ia khun na ka tiket Congress ki la don haduh 5 ngut ki kyrtong kiba la thep aplikeshon na ka bynta ban ia khun na ka Nongshken Konsti twensi. Kitei ki 5 ngut ki kyrteng ki kynthup ia 2 ngut ki kynthei bad 3 ki rangbah, katkum ka jingioh lum jingtip la iathuh ba kitei ki 5 ngut ki kyrtong kiba la dep aplai ia ka tiket Congress ki long u Bah Lutphar Dkhar, Bah Wengstone Rangjem, bah Anthony Khongwang katba ki ar ngut ki kynthei pat ki kynthup ia ka kong Newly Ryndong bad ka Thei Hun Mawkon. La ong ba kitei ki 5 ngut ki kyrtong ba aplai tiket na ka seng Congress ki dei hi ki briew kiba ia don ha kti ha kjat bad u MLA ka Pynursla u Bah Prestone Tynsong.
Haduh mynta ym pat ioh jingtip kaba thikna shano ka lyer tiket Congress ka beh ha katei ka konstitwensi na ka bynta ka ne ka elekshon MDc 2014 ka ban sa long shen la kumno kumno ha u rymphang. Katkum ka jingioh lum khubor la ioh jingtip ruh ba baroh kitei ki 5 ngut mynta ki dang ia don hapdeng ka jingbun kam ban iaid ha la ki kam jong ki ban pynkhreh lypa na ka bynta katei ka elekshon ha kaba baroh na ki la leit ban ud ban nam lypa sha ki paidbah. Haba ia kren bad u Rupang iwei na kitei ki nongaplai tiket i la iathuh ba ka rai iano ban ai tiket ka dei hi ha u paidbah ka Konstitwensi iano u imon. Haba la kylli pat lada ym ioh tiket na ka seng Congress hato kin ia aireng ne-em ha ka elekshon , ka jubab ba la ioh ka long ba baroh kitei ki 5 ngut ki don ka juh ka jingkut jingmut ba lada ka tket ka leit sha uno uno ruh hynrei kin ai ka jingkyrshan sha uta u ba ioh ia ka tiket bad kin ym ia khun pyrshah ia u.
Kum ban shu kdew ba baroh kitei ki 5 ngut ki dei ki briew kiba trei dohiap ban pynjop ia u Bah Prestone Tynsong ha kane ka elekshon ba la dep bad ka rai ban ai ia ka tiket MDC lehse ka long kaba jwat ia u Bah Prestone ban pashat jingmut ha ka elekshon Komiti jong ka Block Congress ha katei ka konstitwensi.