Shillong: Ka Achik Literature Society ha ka jingialang jong ka kaba la long ha ka sngi saitjaiñ ha Tura ka la shim ia ka rai ban thoh sha ka sorkar jylla ba ka dei ban ia khun na ka bynta ban pynrung ia ka ktien Garo ha ka khyrnit kaba 8 jong ka riti Synshar ka Ri India. Katei ka kynhun ka la ong ba ki don haduh 8 lak ngut kiba kren ia ka ktien Garo katkum ka Census jong u snem 2011 bad kitei ki dei kiba sah ha Meghalaya, Assam,North Bengal, Tripura, ha Nagaland bad ki don ruh ha ka ri Bangladesh.
Katei ka kynhun ka la pynkynmaw ruh ia ka jingiaid lynti jong ka bun snem ha kaba ia khun ban ithuh ia ka ktien Garo. Ka la ong ba la sdang ha u 2015 lyngba ki lai tylli ki kynhun ka Achik Literature Society, Garo Graduates Union bad Senior Citizens Forum. Ha katei ka por ka la ong ba la thoh shithi dawa sha u Purno A Sangma uba dei u M P ka jong ka Tura.
Hadien ba la ioh ia katei ka shithi ruh ka ong ba u Purno u la leh ia la ka bynta ha kaba u la iatai ha dorbar bah ka ri ha Parliament ha ka sngi dorbar kyrpang jong ka Lok Sabha ban kynmaw ia ka lyngkhuh sngi kha ba 125 snem jong u Dr. Bhimrao Ambedkhar kaba la long ha ka 27 tarik u naiwieng, 2015. Ki la pynkynmaw ba u Purno u la kdew ba ki don haduh 22 tylli ki ktien na ki 28 tylli ki jylla ka ri India hynrei na ka thaiñ shatei Lam mihngi ki don tang 3 tylli kiba la ioh rung sha ka khyrnit kaba 8 kata ka Assamese, Manipur bad Bodo.
Katei ka kynhun ka la pynkynmaw ruh ba ka thoh shithi dawa sha u myntri rangbah ka jylla u Dr.Mukul Sangma ha u naiwieng, 2015 bad la phah ia ka shithi lyngba u DC WGH ba ka sorkar kan thaw ia ka komiti ka ban ia kren ia katei ka bynta bad la pynkynmaw biang ia katei ka shithi ha ka 10 tarik u jylliew, 2016 hynrei ka sorkar jong u Dr.Mukul ha katei ka pork am shym la pynshah shkor satia. Kham hadien la phah sha u MP ka Tura u Conrad K Sangma. Ka la pynkynmaw ruh ba u Saleng A Sangma u la iasaid bha ha ing dorbar thaw-aiñ ka jylla ba dei ban ithuh ia ka ktien Garo ha ka ri India bad ki jingdawa jong u ki don ha ka rikod jong ka ing dorbar.