Nongpoh: Ka kynhun ki nongniah Auto ha Nongpoh kiba don hapoh ka shatri jong ka Nongpoh Region Auto Owners & Drivers Association (NROADA), ki la pynbna paidbah ba ha ka 20 Tarik mynta u bnai, kin pynlong ia ka jingiaid paidbah na Pahamsyiem sha ophis u District Transports Officer Nongpoh. Kaba long kum ka dak ban pynpaw ia ka jingpyrshah halor ka jingkiew dor ba khah khah ka umphniang Petrol bad Diesel.
Haba pyntip sha ki nongthohkhubor, u Bah J. Syngkli, organizing secretary ka NROADA, u la ong ba ka daw kaba la pynlong ia ki ban shim ia katei ka sienjam da kaba pynlong syndon da ka jingiaiaid paidbah, ka dei hadien ba kum ki nongniah Auto, ki la shem jingeh shikatdei eh na kane ka jingkiewdor ba khah khah ka umphniang.
Ngi tip ba kane ka jingkiew dor ba khah khah ka Petrol bad Diesel, ka ktah ym tang ia ki nongniah Auto ha Nongpoh, hynrei ka ktah ia ki paidbah ym tang ha ka jylla, hynrei ha ka ri hi baroh kawei.
Namarkata, kum ka kynhun ki nongniah Auto, ngi kyntu ia baroh ki nongniah Auto bad kiwei kiwei ki kali kamai na ki Association bapher bapher ba kin wan ban iasnohktilang ha katei ka sngi, u la bynrap.