Da ki jingiakhih yn aikhublei snem thymmai ka JSU ia ka sorkar

Shillong,18 Nohprah:
Ka Jaintia Student Union, JSU Sengkmie ka la byrngem ba da ka jingiakhih kan ai khublei snem thymmai ia ka sorkar lada jia ba kam lah ban pynioh ia ka laisen jong ka Blood Bank ha Jowai. Ka JSU ka la pynpaw ba mynta la saw bnai ka sorkar kam lah ban pynurlong ia katei ka jingdawa ka seng. Ka JSU kham mynshuwa ka la dawa na ka sorkar ba ka dei ban kyntiew kyrdan noh ia ka Civil Hospital Jowai kum ki Hospital kiba don ha ka nongbah ka jylla bad ban shna thymmai katei ka hospital bad mynta ka jingpynpra ia ka Hospital kaba rim ka dang iaid shakmat katba ka seng ka la dawa ruh bay m tang ka jingpynpra kaba donkam hynrei ka sorkar ka dei ban buh noh ia u mawnongrim na ka bynta ban tei thymmai ia katei ka Hospital. Ka la dawa ruh ban pyntreikama noh ia ka Hospital kaba don ha Ialong bad ia katei ka jingdawa ka sorkar ka la pyndep.
Ha kaba iadei bada ka Blood bank ka JSU ka la iathuh ba watla ki nongtrei ki tiar ki tar bad ki jingdonkam ha katei ka jaka ki la biang lut hynrei kaba sah pat mynta ka long ka laisen bad dei namar ka laisen ba katei ka tnad sumar kam lah ban pyntreikam ia ka kam jong ka. Ka seng ka ong ba na ka liang ka sorkar jylla ka la dep thung ia u Doctor, ki staffs nurse, ki Lab technicians, ki lab attendance bad kiwei ki wei bad ha ka jingleit jngoh jong ka ia katei ka Blood Bank ka la ia kynduh ia u doctor Nongbri I/c Blood Bank haka ba u la ong ban na ka liang ka jong u, u la dep ban pynbiang lut baroh ki jing don kam bala pan da ka tnad Drugs and Cosmetics bad kumjuh ruh ki tiar ki tar ki la biang lut naka bynta ban ioh ia kane ka license,Hynrei naka liang u Doctor, um pat lah ban pyntikna pat lano yn ioh iaka license ban ioh sdang iaka Blood Bank.
Haba pynpaw ia ka jingsngewkhia halor jingduh noh ia bun ki mynsiem namar ka jingbymlah ban ioh snam haba wan ka jingdonkam kyrkieh ka kyrwoh na u Finance Secretary JSU Samla H. Symblai, ka la dawa na ka sorkar ba ka dei ban pynioh noh ia katei ka laisen jong ka Blood Bank lym kumta ka seng kan pynlong da ki jingiakhih tang shu mih u snem thymmai.