U Mukul um tip ia ka riti synshar ne u ialam bakla ia ki paidbah: Sadon

Shillong,17 Nohprah:
Ki Sengbhalang ki la kynthah jur ia u Myntri Rangbah ka jylla u Dr.Mukul Sangma uba haduh kine ki sngi u dang kyntait ban pyntreikam ia ka ILP ha ka jylla , da kaba kynnoh ba ka sorkar pdeng kam shah ban pyntreikam ia ka ILP ha kane ka jylla kumta hap ban thaw da kawei pat ka ain na ka bynta ban khang lad ia ka jingwan rung kyrthep ki mynder bad ki bar jylla sha kane ka jylla.
Ha ka kyrwoh ba la phah da u Generala Secretary ka HNYF u Bah Sadon Blah ha ka kyrteng ki 13 sengbhalang kiba dawa ILP , ka la ong ba naduh kaba sdang ka jingiakhih ki sengbhalang ki la tip lypa ba ka mat ILP ka dei ka mat kaba hap ban tuklar tang da ka sorkar jylla ym kumba ka lynnoh da u Myntri Rangbah u Dr.Mukul ba hap ban da leit tied jingkhang na ka Parliament. U Bah Sadon u la ong ba katei ka ain ba hap ban tuklar tang da ka sorkar jylla ka la paw shai kdar ha ka Ing Dorbar tlang ka Parliament, ha kaba u MP ka Shillong u Ma Vincent pala u la pynsngew ia katei ka mat ha ka ing dorbar bad ba ka Ing Dorbar ka la bret ia katei ka kam ha ka sorkar jylla. U Myntri ka kam pohing u Shri Sushil Kumar Shinde uba la kren shai ba katkum ki Riti jong ka ILP, ka hap ban tuklar tang da ka sorkar jylla.
Ki 13 seng ki la kynnoh ba ka jingong u Myntri Rangbah ka jylla ba ka ILP ka dei ka mat ba hap ban tied jingkhang ha Parliament ka lah ban dei tang ka jingbym don jingtip jong u shaphang ka rukom pyntreikam ia ka ILP ne ka lah pynban ban dei tang ka jingthmu jong u ban ialam bakla ia ki paidbah ka jylla. U Bah Sadon u la ong ba ka jingkren jong u Myntri ka kam pohing ka sorkar pdeng ka la pynrem lypa ia ki jingkren jong u Myntri Rangbah uba la kam ba u la ioh ia ka shithi na u joint Secretary ka home ministry ba ym lah ban pyntreikam ia ka ILP hapoh ka jylla.