Shillong: Ka sorkar jylla ka la pdiang ia ka jingpynjynsur ia ka rta na ka bynta kiba kwah ban iakhun ia ka kam hikai na kaba mynta kaba long 27 snem sha ka 32 snem bad la pynjynsur ruh sa san snem ia ki scheduled tribe, kaban long 37 snem.
U Myntri ka tnad pule ka jylla u Bah Lahkmen Rymbui u la ong ba kane ka jingpynjlan ia ka rta, ka long hadien ba la bishar bniah khnang ban ioh ia ka jingpule bad ka jinghikai kaba biang.
Haba pynksan nia halor kane ka jingpynkiew rta, u Bah Lahkmen u la ong ba bunsien ki nonghikai hadien ba la pyndep ia ka jingpule degree, ki hap ban pyndep sa ia ka B.Ed, hynrei kito kiba pule lei kham shalor kum ka Master Degree, doctorate kim lah shuh ban ioh iakhun kam ne applai namar ba ka rta jongki, ka la mareh shabar u lain ba la buh ka sorkar kata tang hapoh 32 snem.
Kane ka dei ka jingeh ia ki samla kiba kwah ban pule janai, hynrei ki la poi pynban sha ka duh kam tang namar ba ka syngit ka rta.
“Halor kane, ngi la rai ban pynjynsur ia ka rta wad kam khnang ban pynbha ia ka pule puthi da kaba ioh ia ki nonghikai kiba tbit kiba biang ka kyrdan”, la ong u myntri.
Ha kawei ka liang, u Bah Lahkmen u la pyntip ba ka jingialang ka kynhun myntri, ka la pdiang ruh ia ka jingtyrwa ka tnad pule ban pynkiew ia ka baibam jongki khynnah kiba la pass ia ka eksamin ba ju pynialeh da ka Directorate of Educational Research and Training (DERT) khnang ban ai baibam.
Ka sorkar ka la pynkiew na ka T.100 sha ka T.600 shi bnai ia ki Lower Primary bad na ka T.40 sha ka T.600 ia ki Upper Primary shi bnai.
Kane ka jingpynkiew ka long hadien phew snem ba ka sorkar ka la pynneh ia kane ka juh ka baibam kaba ju ai ia ki khynnah kiba la pas ia ka eksamin.
Ia kane ka eksamin la pyllong da ka DERT man u snem ia baroh ki khynnah skul ha ka jylla kum shi bynta ban pynshlur ia ki ban pule bad minot bha ha ka jingpule.
“Ngi la pynkiew ia kane ka baibam khnang ban ai mynsiem ban pynshlur ia ki khynnah skul”, la ong u Bah Lahkmen.
Shuh shuh ka sorkar ka la mynjur ruh ban thung nonghikai 16 ngut ha Williamnagar bad Tura Govt College. U Myntri u la iathuh ba ia ka Tura, ki don lai tylli ki kam la lait katba ha Williamnagar ki don 13 tylli.