Pyrshah ki Khlieh Nongsynshar ban den wah Umiam

Shillong,16 Nohprah:
Ka Dorbar Ki Nong synshar Raid, Nongsyn shar Shnong jong ka thain Mawhati bad Ri-Bhoi ki la ia lum mynta ka sngi ka 16 tarik u nohprah, ha Shnong Mawhati Jatah, Ri-Bhoi District, ban pyrshah ia ka jingthmu jong ka Sorkar Assam ban den ia ka wah umiam – sha ki thain Lamalong kaban ktah ia kiwei kiwei ki Shnong bad ban ia kren ruh halor ka Draft Village Administration Bill 2012 ba la pynkhreh da ki bor KHADC.
Ha katei ka jingia lang la wan ia shim bynta da ki Syiem, kI Basan, ki Lyngdoh Raid, kynthup ki Rangbah Shnong na ki shnong bapher bapher jong ka thain Ri Bhoi District. Ha katei ka sngi la ioh ka jingkren na u Bah RB Shadap, President, Synjuk Rangbah Shnong, Ri-Bhoi District, uba la wer ia ka jingiatylli jong baroh ha ka thain Ri bhoi ban nym ai lad ia katei ka jingthmu kaban ktah ia ki jaka puta jong ki paidbah kiba duk.
Ha kaba iadei bad ka draft bill jong ka KHADC u Bah RB Shadap, uba long ruh u Rangbah Shnong Umdihar, u la ong ba katei ka bill dang donkam ban pynjanai shuh shuh ba kin paw ki Riti ki Dustur kiba kyrpang kiba don khamtam ha ka thain Ri Bhoi, u la ong ba ha ka jingshisha ki la dei thaw ka Administration Bill na ka bynta ki Shnong ki Raid bad Hima ha ka juh ka por ym ban wanrah tang ka ain shnong bad ka dei ban dang don ka jingiakren kiba kham bniah bad ki nongsynshar raid bad Hima halor katei ka Bill.
La ioh ruh ia ka report na u President bad Joint Secretary, ka joint Action Committee halor ka jingleit ujor ka jong ki sha ki bor Sorkar, bad ki bor District Council.
Ha katei ka sngi la ioh jingkren na u Bah John F Kharshiing, Chairman, Ka Dorbar Ki Khlieh Nongsynshar, uba la tyrwa ia ka jingiatreilang ban iada ia ka hok jong ki paidbah kiba lui lui. U la ong ba lada ki paidbah ki ia tylli ym don ba lah ban knieh jubor ia ka khyndew ban dakhol jubor khlem da mynjur ka Dorbar Shnong ne Dorbar Raid ne khlem da mynjur da ka Dorbar Hima.
Ha kaba iadei bad ka Draft Village Administration Bill 2012 ba la tyrwa da ki bor KHADC, u Bah John Kharshiing, u la ong ba ka long kaba donkam ba ki bor KHADC kin shim ia ki jingai jingmut na baroh ki liang, kam lei lei lada kham slem ka por ban thaw ia ka ain tangba ka dei ban long kaba ia hun lang baroh bad kadei kaban long kaban nang pynjanai bad ka ban nang pynkhraw ia ki Riti Dustur jong ka jaidbynriew kaba kyrpang.