Lah ban sangeh iakhih shipor ki Sengbhalang Bun kiba pyrshah ia ki pakhang Shnong, ba la jan ka Khristmas

Shillong, 15 Nohprah:
La ki 14tylli ki sengbha lang, kin dang iakhih biang ne kin shongthait Khristmas noh shwa? Katei ka dei ka jingkylli, kaba kiba bun ki ia kwah tip bha ha kine ki sngi.
Man ka sngi u Blei, ka ju mih ka khubor, kaba dei halor ki prokram thymmai jong ki Sengbhalang, kiba ju sdang man la ka sngi hat majai bad ter ter, hynrei haduh mynta ka miet, ha ka por ba thoh ia kane ka khubor, ym shym la ioh kyrwoh khubor eiei, na ki Sengbhalang bad katei ka paw, ba imat, kumba kam don satia kano kano ka prokram, ka ban mih noh la Sngi Hat majai ne ha kine ki khyndiat sngi ban sa wan.
Ki don ki lad khubor, kiba iajan ba ki Sengbhalang, kiba iathuh ba kan lah ban don da ka pakhang surok miet, tangba katei kan lah ban sdang ha ka Sngi Palei, namar ba ka 18tarik ruh kan dei ka sngi shuti Soso Tham bad kumta kan lah ban nym don prokram iakhih eiei, ha shwa jong ka Balang, ong ka khubor.
Ki don ruh ki khubor, kiba iathuh ba kitei ki Sengbhalang, kin dang ia kynduh lashai ka sngi, ha kaba lehse, kin sa shim ia ki rai jongki, la kin dang bteng ia ki jingiakhih jongki, ne kin shim shuti Khristmas shwa ia mynta katto katne taiew.
Namar ba ka jingkhot pakhang shnong ruh, ka long kaba ki briew, ki sngew pyrshah bha ha kine ki sngi bad nangta sa ka pakhang ophis ruh, ka long kaba ki nongtrei ophis, kim shym ia trei lang satia, kumta ki Sengbhalang, kim banse ban pynlong da ka pakhang surok miet, lane da kaba kin hap ban pynsangeh shwa shipor, ia ki jingiakhih jongki.