Iaroh Thadlaskein Block ka JSU

Shillong,15 Nohprah:
Ka Jaintia students’ Union (JSU) sengkmie ha ka jingpyllait khubor mynta ka sngi lyngba u General Secretary samla Emperor Bareh ka la ai ka jingiaroh ia ka Thadlaskein Block da kaba kam ba ka seng ka la lap ba katei ka block ka la pyntreikam bha ha kaba ia dei bada ka scheme NREGS ne ka scheme bylla 100 sngi.
Ka seng ka la iathuh ba ha ki khyndiat sngi ba la dep ka la leit ban jngoh ia ki katto katne tylli ki shnong hapoh ka jingialam u General Secretary , ki shnong kiba kynthup ia ka Raliang, Shangpung, Mookhap, Mookaiaw,. Mootyrshiah, Kyrwen bad kiwei bad ka la lap ba kitei ki shnong ki la ioh jingmyntoi shibun na katei ka scheme kum ki lynti iaid kjat, ki surok shnong, ki umbam um dih, ki pung um bad kiwei kiwei .
ka seng ka la ong ba naktei ka scheme ym tang ba ki paidbah ka thain ki la ioh jingmyntoi ha ka roi ka par hynrei ki la ioh kam ioh jam rurh ha kaba ki lah ban trei bylla 100 sngi ha ka shisnem. Ka la kyntut ia kiwei pat ki shnong ba kin bud ia ka nuksa kaba ka Thadlaskein block ka la pyntreikam.