Yn leh kam phylla, ki MDC ka KHNAM mynta ha KHADC Mynta ka dorbar phiah constituency ka KHADC

Shillong, 13 Nohprah:
Ka dorbar kyrpang ka KHADC ban phiah ia ki constituency thymmai kan long lashai ka sngi Saitjain. Ka KHNAM kaba don saw ngut ki MDC ka la byrngem ban leh da ki kam phylla ha kane ka dorbar ban pyrshah ia ka jingthmu ban phiah ia ki constituency namar ba la shu leh lymmuh tang ban pyndep khlem da iaid katkum ki kyndon ba dei ban leh.
Mynta ka sngi, ki MDC ka KHNAM bad katto katne ki bym dei na ka KHNAM, ki la leit iakynduh ia u Lat ka jylla u Dr KK Paul ban pynpaw pyrshah ia ka jingleh ka Executive Committee jong ka KHUDA ba ialam da ka Congress ban phiah ia ki constituency khlem da iaid katkum ki kyndon.
Ka thymmei khubor, ka iathuh ba ha kane ka jingiakynduh, ki nongialam ka KHNAM bad kiwei, ki MDC ki la kyntu ia u Lat ba un nym shu pdiang matlah ia ka Bill ba ka KHADC kan ai sha u namar ba ia ka jingbishar paidbah ban phiah ia ki constituency la shu leh khlem bud ia ki kyndon ba dei.
Katkum ka khubor ba la iohlum, ki don kumba 7 ngut ki MDC ki bym iahap ia kane ka jingleh ka EC bad kin sa ieng pyrshah lashai ha ka iing dorbar jong ka Council.
“Katkum ka rukom, ia ka jingbishar paidbah dei ban leh ha jaka jong ka constituency hynrei ka Delimitation Committee ka la khot pynlong ia ka jingbishar paidbah ha ophis ka KHADC ha Shillong”, la ong uwei u MDC ka KHNAM bad kane kam dei kaba bud katkum ka jingbthah jong u Lat ka jylla.
“Ki la pynkhein ia ka hukum ne ka jingbthah jong u Lat da kaba pynlong ia ka jingbishar paidbah ha ophis ka KHADC ha Shillong”, la ong biang u MDC bad bynrap, ba ka KHNAM kan ieng beit ban pyrshah ia kane ka jingleh ka EC khlem da iaid katkum ki kyndon.
Ka HSPDP kaba don mynshwa ha ka KHUDA, ka la weng noh hadien ba ka la don ka jingiapher jingmut halor ka ILP. Kumba long mynta ka EC hapoh ka jingialam u Bah Pynshngain ka don sa ka UDP, ka Congress bad ki MDC shimet.
Lah ban kdew ba ka EC hapoh ka jingialam jong u Bah Pynshngain ka la thung ia ka Delimitation Committee ban bishar paidbah ia ka jingthmu ban phiah ia ki constituency da kaba thmu ban pynduh ia ka Laitkroh bad ban pynmih thymmai ia ka Umsning kaba don ha Ri-Bhoi.