Ha ka jingiakren bad ki nongthoh khubor, hadien ba la dep ban pynbna ia ka resol MLA mynta ka sngi, na ka liang jong u bah Pius Marwein, u la ong “Ka jingresain noh jong u M.M.Danggo ia ka shuki MLA ka la pynlong ia nga ban jop ia kane ka ilekshon shiteng samoi” da kaba u la bynrap shuh shuh ba ka jingjop ka jong u ia katei ka ilekshon shiteng samoi ka dei ka bok ka jong u, namar ba ha ka ilekshon MLA kaba la dep u Danggo um shym tam bun ki vote ia u, hynrei u la shah rem noh bad ka daw hi ka long ba um pat da shemphang bad dang duna ka jingiaid lynti ka jong u ha ka kam sain hima sima, hynrei ka jingailad biang ka jong u Danggo ia katei ka sien kaba ar, ka la pynlong ia u ban shim kabu ban iakhun haduh ban da poi sha ka thong.
U-bah-Pius-Marwein-hadien-ba-u-la-shah-pynbna-kum-u-MLA-ba-thymmai-ka-Ranikor-Konstitwensi.
Haba kylli kum u MLA ba thymmai kiei ki kam kiba un leh ia ka Ranikor Konstitwensi, U bah Pius u la ong ba haba phai sha ka dong ka thaiñ jong ka Ranikor Constituency ka long kaba dang sahdien ha baroh ki liang, hynrei kaei ka thong kaba u don ka long ba un phai khmat nyngkong eh sha ki surok kiba dei u budlum jong ka roi ka par, ki jaka ai jingsumar bad ka jaka pule kaba long kaba dang sahdien namar ha baroh kawei ka Konstitwensi ym pat don tang kawei ka kolej ruh, bad kumjuh ban pynbit pynbiang ia ki jaka ai jingsumar.
Shuh shuh haba kylli kiei ki lad ki lynti ba un shim kum u MLA halor ka jingeh jong ki paidbah ka thain ha kaba iadei bad ka jingshah khang tih dewiong, u bah Pius u la jubab da kaba u ong ba “Ngan sa shim khia bad buddien halor ka jingtih dewiong namar u dewiong hi hapoh ka dong ka thaiñ ym dei ba u ai jingmyntoi tang ia ki trai shnong lane ia ki paidbah ka Ranikor hynrei u dewiong u ai jingmyntoi ia baroh ki paidbah jong ka Meghalaya” ong u bah Pius da kaba u la bynrap shuh shuh ba ha kaba iadei shaphang jong u Uranium u bah Pius u la ong ba um kwah ban kren eiei halor katei ka bynta namar u la ong ba kam shong ha ka rai ka jong u kum u MLA, hynrei kandei ka rai jong u paidbah bad ma u kum u MLA un ieng lang ryngkat bad ki paidbah.