Shillong: Ka Rangdajied United FC ka la pynliem ia ka Nangkiew Irat da 3-1 ha ka lympung Officer Choice Blue Shillong Premier League ka SSA kaba la long mynha ka sngi Thohdieng ha madan JN Stadium, Polo.
Ka Rangajied ka la thep ia kine ki kol lyngba u Raitkutshisha Buam ha ka 27 minit, u Reson Malngiang ha ka 72 minit bad u Chanmetre Thma ha ka 79 minit katba ka Nangkiew Irat ka la thep u Chesterfield Nongdhar ha ka 34 minit.
Ha ka jingiakhun jong ka kylla miet, ka la nang itynnad ha kaba ki rang ialehkai nabroh ar liang ki la iakhun tyngeh ban ioh pynkhih jar ban rah ia ka thong jingjop.
Ka jingtbit ki rang ialehkai khmat ka Rangdajied ban rah bol ka la pynlong ia ka rangap dien ka Nangkiew ban ym lah shuh ban tehlakam bad iada ia ka kol, u Reson Malngiang na ka Rangdajied ula thep ia ka kol ba-ar ha ka 72 minit bad hadien hynriew minit u Chanmetre Thma ula thep ia ka kol balai ha ka 79 minit ban pynthikna ban rah ia ka jingjop.
Da kane ka jingjop ka la Rangdajied ka la ioh ban kamai 3 point katba ka nangkiew Irat kala hap ban leit phai iing thylli.
Ha ka jingiakhun jong ka 2nd division, ka Laitlyngkot bad Jongksha ki la hap ban iasam mar shi point hadien ba ki la iakhaid khlem don ba thep kol ha ka lympung ialehkai second division ka SSA mynta ka sngi ha madan Polo.
Katba ha ka 3rd division, ka Lumdiemngjri ka la iakhaid bad ka Young XI hadien ba ki la iakhaid khlem don mano mano ban ioh thep kol.
Ha kawei pat ka jingiakhun ka Lamlynti ka la pynliem ia ka Green Age da 2-1.
Ia ki kol na ka Lamlynti la thep da u Komarness Shabong ha ka 13 minit bad u Teilang Kurbah ha ka 54 minit. U Feffry Massar ula pynphai shikol lyngbe ka penalty na bynta ka Green Age ha ka 34 minit. Ka Mawreng ka la pynliem noh da 1-0 ia ka Umphrup. Ia kane ka shikol la thep da u nangseibor Rani ha ka 28 minit jong ka kylla step.