Shillong: Ka jingwan jong ki nongthep vote ha elekshon shiteng samoi kaba long mynta ka sngi ha Ranikor ka la kot sha ka 82.81 percent katba ha South Tura ka la kot sha ka 72.81 percent haduh ka 5 baje janmiet.
Ki longkmie kiba dang ap pali thep vote ha Ranikor Constituency:Wlytan
U Chief Electoral Officer (CEO) ka jylla u Bah FR Kharkongor u la ong ba kane ka jingwan thep ka lah ban kham kiew shuh shuh namar ba ki dang don ki jaka kiba khlem pat lah ban ai jingkhein haduh kane ka 5 baje janmiet khamtam kiba hap ha Ranikor konstitwensi kaba bun ki jaka ba hap ban iaid kjat.
Ha kane ka elekshon ba dang shu dep, ka Ranikor ka la poi sha ka 89 percent katba ka South Tura ka la poi sha ka 73 percent.
U la iathuh ba ki don 3 tylli ki mashin ba thut ha ki jaka thep vote ha Ranikor bad 4 tylli ha South Tura hynrei la lah ban pynbeit da kaba bujli da kiwei kiba biang. Baroh ka jingthep vote ka la iaid beit khlem don kano kano ka jingpynthut.
“Ka elekshon ka la iaid beit khlem don jingthut eiei naduh ba sdang haduh ba kut”, la ong u Bah Kharkongkor.