Shillong: Ka Malki SC ka la iakhun tyngeh hynnin ka sngi hynrei ka lad kam shym la ailad ia ka ba kan ioh ia ka jingjop bad ka la shah rem salit noh da 2-1 ha ka Rangdajied United ha ka jingiakhun jong ka lympung Shillong Premier League.
Ia kine baroh lai tylli ki kol la thep ha ka kyllamiet jong ka jingialehkai hadien ba ka kylla step ka la iakhaid.
Ka Malki ka la sdang da ka jingiakhun kaba kham satar ha ka kyllamiet ha kaba ka la jan ioh ban pynkhih jar ha ka 46 minit lyngba u Ronnie Nongbri hynrei la ioh ban kyrda noh da u nongapkol ka Rangdajied u Padam Chettri.
Hynrei ka Malki ka la shah thep noh pynban ha ka 64 minit lyngba u Rikmenlang Marwein uba la kynjat da ka free kick ia ka Rangdajied.
Ka jingshah thep kam shym la pynduh mynsiem bad ka Malki ka la ioh ban pynphai ha ka 86 minit da ka kol ba kum bakla u nongialehkai ka Rangdajied u Atlanson Kharmaw.
Pynban ka nam jop ia ka Rangdajied ka la wan ha ka 89 minit lyngba u Ambilstar Sun.
Ka Malki kan iakhun sa ia ka Meghalaya Police ha ka 20 tarik.