Shillong:Ka HNLC, ka la kynjoh sha ka rta kaba 31snem jongka mynta ka sngi bad katei ka seng ka ai khublei kyrpang ia ki para nongialam, ki paradkhot, ki nongiarap ka seng khamtam eh ia kiba ha iing ba ha sem jong kito ki dkhot ka seng kiba lah khlad noh.
Ka HNLC, ka pynpaw shuh shuh ba ha ki snem kiba lah leit, ka la mad ia ka jingduk jingkyrduh, ka jingleit pyndem noh ki dkhot, ka jingshah pyniap,ka jingshahkem ki dkhot kumjuh ki tiar ialeh, hynrei kine ki dei tang ki bynta ha ka jingialeh, kiba kum ka seng ka hap ban iatyngkhuh. “Kumba long mynta ngi iohi ba ngi lah khambiang ha ka liang ka pisa, ngi lah khambiang iaka jingdon ki dkhot ha ka jingbunpaid khamtam eh ka jinglah jong ka seng ban thied ia ki tiarsiat kiba dang thymmai, wat lah ngi hap ban iaid lyngba kino kino ki jingeh, hynrei ka Seng kam shym lah shongthait ban trei katba jan ka kti ne ka khlieh na bynta ban kyrsiew pat ia ka Jaidbynriew ba kan lait na ka jingshahtyllep, ka jingshah sait jabieng ha kita ki bor kiba napoh bad ki bor kiba nabar” ong shuh ka kyrwoh na U bah Sainkupar Nongtraw Publicity Secretary ka HNLC.
Ka HNLC, ka pynsngew ruh ba ha ka jaka ba ki Hima ki Shnong ha ka bri u Hynñiewtrep kin rakhe ia ka sngilaitluid ka Ri India ha ka 15 tarik u Nailar, ki lah dei ban rakhe da ka sngilyngkhuh sngikha jong une u riewialeh bym lah pyndem kum ka ‘Wickliffe Syiem day’ uba la kha ha kajuh ka tarik kata ha ka 15tarik Nailar 15, 1909.
Ha kine ki 31 snem ba lah leit ka HNLC ka ieng halor kitei ki jingshisha, halor kitei ki nongrim ba ka Jaidbynriew Hynñiewtrep kam shym dei satia ka bynta jong ka ri India.Ka Sorkar India kan nym lah daleilei ban pynbeit ia kine ki jingeh da ki bor jong ki ktang suloi, hynrei ka donkam ban weng ia kine ki jingeh hajrong ka miej ban iakren sngewthuh lym kumta ka HNLC kan nym shongthait wat lada ka dang shimpor biang sa 31 tylli ki snem ruh.
Ha kane hi kajuh ka sngi ka Seng ka wer ia ki khun samla ka bri u Hynñiewtrep ba lada ki don shisha ka mon bajwat ban iakhun na bynta ka jinglaitluid jong ka synshar khadar ka Jaidbynriew, ba kin rung sha ka HNLC, namar ka dei ka sengtreimon sngewbha.