Shillong: Lai tylli ki skul kin mihkhmat na ka East Khasi Hills District sha ka Stata level Subroto Cup football tournament 2018.
Ka H Elias HSS kan mihkhmat ha ka kyrdan ba hapoh 17 snem ki shynrang katba ka Umthli SS kan mihkhmat jong ki kynthei bad ka Umpohliew Jingtip SS, kan mihkhmat ia ki khynnah shynrang ba hapoh 14 snem.
Kane ka long hadien ba ki la lah ban jop haka jingialehkai ban iaknieh ia ka nam lahduh kaba long myn hynnin ka sngi napdeng ki skul jong ka East Khasi Hills, kaba la long ha madan JN Stadium, Shillong.
Ha ka jingialehkai jong kiba hapoh 17 snem ki shynrang, ka H Elias ka la pylliem salit ia ka OM Roy Memoral HSS da 1-0 kol bad ia kane kawei ka kol ka jingjop, la thep da u Henry Nengnong haka 42 minit.
Ha ka jingshisha, ka jingialehkai, kine baroh ki long kiba iabiang bor bha namar ba ka bol ka mareh khlem shongthait namar ka jingiakhun tyngeh ban ioh thep ia ka kol. Shiphang la iohi ba ka bol ka la poi sha ka ktem ka H Elias bad shiphang ka la poi shaphang ka kol ka OM Roy hynrei ka minit kaba 42, ka la pynkylla dur ia ka jingialehkai hadien ba ka H Elias ka la ioh ban khyrwit jlang ha ka kol.
Ha ka jingialehkai jong ki khynnah shynrang ba hapoh 14 snem, ka Umpohliew Jingtip ka la jop da ka bol shu buh (tie-breaker) da 5-4 kol ia ka United Christian hadien ba ka jingiakhun ha madan ka la iakhaid khlem don ba lah ban iathep kol.
Katba ha ka jingiakhun ki kynthei hapoh 17 snem, ka Umthli SS ka la pynbam jem haduh 11-0 ia ka Unitarian HSS Puriang. Ia kine ki kol, la thep da ka Misilia Majaw haduh 9 kol ha ka 5,7,12,15,21,32,37, 42 bad 49 minit katba ka Marbari Nongrum ka la thep ar kol ha ka 11 bad 14 minit.
Ha kane ka jingialehkai, la sakhi lang u District Sports Officer (DSO) ka East Khasi Hills u Bah Denial Dan bad u Chief Executive Officer (CEO) ka Meghalaya Football Association u bah Arki Nongrum kiba la sam ruh ia ki khusnam sha ki lahduh.