Nongpoh: Ar-Taiew tam hadien ba ki Bor Distrik na Ri Bhoi bad Karbi Anglong District, ki la pynlong ia ka jingiakren haba iadei bad ka jingeh kaba la iakynduh da ki paidbah kiba shong ba sah ha ki thain Block-2 bad khamtam na ka bynta ban weng ia ki jingpynwit haba wan kino kino ki kam pynroi, hynrei la iohi pynban ba katei ka jingiakren kam poi shano shano, namar ki Pulit ka Assam kim shem la burom ia katei ka jingiakren bad halor kane la sakhi ia kawei ka jingwan pynsangeh da ki Pulit ka Assam ia kawei ka jingtei, ia kaba ka sorkar Meghalaya ka la mut ban tei ia ka skul SSA kaba don ha shnong Khliehumwang, Ri Bhoi District.
Ka iing skul SSA ha shnong Khliehumwang, kaba la mut ban shna Building ia kaba la wan ban khang noh da ki Pulit ka Assam
Haba iadei bad katei ka jingwan pynsangeh jubor da ki Pulit ka Assam ha ka ban pyntrei ia katei ka iing skul, myn hynnin ka sngi ka Synjuk ki Rangbah shnong kiba don ha katei ka thain, ki la leit ban kynduh ia ka Kong RM Kurbah, Deputy Commissioner ka Ri Bhoi, ban iathuh halor katei ka jingjia bad ban kyntu ia ka ba ka dei ban tuklar halor katei ka jingwan pynsangeh da ki pulit ka Assam.
Haba pyntip halor katei ka jingjia, U Bah Kojen Muktieh, Rangbah shnong ka Khliehumwang, u la iathuh ba naduh ba la sdang ban shna ia ka Building jong katei ka skul, ki pulit ka Assam jan manla ka sngi ki wan ban jurip, ha kaba ki la ong ruh ba ki dei ban pynsangeh noh ha ka ban pyntrei ia katei ka iing skul. Hynrei ka jingwan ban pynsangeh ban pyntrei ia katei ka skul ka la jia mynha ka 5 tarik mynta u Bnai, ha kaba ki Pulit ka Assam kiba la wan ryngkat ki CRPF, ki Battalion ki la leit ban pynsngeh noh ha ka ban pyntrei ia katei ka skul.
Haba batai halor katei ka Building SSA thymmai ha katei ka shnong, u Bah Kojen Muktieh, u la iathuh ba ki la ioh jingiarap na ka DMC SSA SMAM na ka Sorkar Meghalaya, ha ka jingmang tyngka kaba la kot sha ka T. 19 Lak, hynrei ha ka por ba ka jingtrei ka la iaid shaid shaid la wan pynsangeh noh da ki Pulit ka Assam.
“Nyngkong ngi kmen ba ka tnat pule puthi ka la mang tyngka ha kaba shna pynbha pynbha da ka Building na ka bynta ban pynheh ia katei ka skul, namar ka dei ka skul kaba don haduh 103 ngut ki khynnah skul bad ka la shem jingeh shikatdei eh ia ki khynnah ba kin shong ha katei ka skul barim namar ka la jot la pra, pynban haba la ioh ban shna da kaba bha, la wan ban pynsngeh noh da ki pullit ka Assam” kren bynniaw u Bah Kojen Muktieh.
Ha ka jingiakren kaba la donlang da ki nongialam ka Synjuk ki Rangbah shnong jong katei ka thain kaba kynthup ia u Bah Blik Sohtun, u Bah Aloysius Bina, u Bah Kojen Muktieh, u la ong ba ka jingleit ban kynduh ia ka DC Ri Bhoi kam dei tang dei tang namar ka jingshah khang ia ka jingpyntrei ia katei ka Building Skul, hynrei ka daw kaba kongsan eh ka dei namar ba u la shah khot hajir ha ki Pulit ka Assam na ka Ulucunchi Police Outpost, namar ki Pulit ka Assam ki la kynnoh ba u Bah Kojen Muktieh u dei uwei na kiba donkti ha ka ban wanrah ia ki skim pynroi na Meghalaya sha katei ka shnong.
“Haba don kum kine ki jingjia, ym tang manga hynrei ki rangbah shnong ba marjan ha kane ka thain ki tieng that that ia ki Pulit ka Assam, namar ki Pulit Assam ki thwet ia ngi la kham palat ban ia ki Lehnoh” bynrap u Bah Kojen Muktieh.
Namarkata, haba iadei bad katei ka jingwan pynsngeh ki Pulit ka Assam, la kyntu ia ka sorkar jylla ba ka dei ban shimkhia mardor bad khamtam eh halor ka jingshah thwet mangi ki Nongialam shnong. Lada lah lei lei ka bha ia ka sorkar Meghalaya ba ka dei ban pynbiang ia ki bor pahara khang ba ia kaba sah jong katei ka Building yn dang lah ban pyntrei, u la bynrap.