Shillong: U SP ka East Khasi Hills u Davies NR Marak, u la ong ba ka tnad pulit kam shym la ioh jingtip lypa shaphang ka jingwan tur jong ki dkhot ka HYC sha Secretariat mynhynnin ka sngi bad dei halor katei ka daw ba ki dkhot ka HYC ki la ioh lad ban rung haduh phyllaw jong ka Secretariat. “Ngim don jingtip eiei, katkum ka jingiathuh ki nongpahara kiba don ha Secretariat ki la ong ba ki wan uwei hadien uwei bad ki buhrieh ia ki pla kad jong ki, hynrei ki nongpahara ki la kyndit ban iohi ba haba ki la poi bun ngut ha Secretariat ki la sei ia ki pla kad jong ki” ong u SP haba ia kren bad ki nongthohkhubor.
U SP u la ong ba ka jingbym lah ki nongpahara ban khanglad ia ki ban rung hapoh Secretariat ka dei na ka daw ka jingbym tip lypa bad ki nangmut ba ki dei ki briew kiba wan donkam sha Secretariat, hynrei u la ong ba la beh noh ia ki nangtei ban lait na ka jingpynthut ia ka jingtreikam hapoh Secretariat. “Ki nongpahara ki la iathuh ba kim tip eiei, hynrei ngi la leit ban beh noh ia ki na katei ka jaka ban ialam shane sha Parking Lot ka Addll. Secretariat” u la ong. Lah ban kdew ba bunsien haba jia kino kino ki jingiakhih ka tnad pulit ka ju ioh jingtip lypa lyngba ka tnad syntiat jong ka hynrei myn hynnin ka sngi ka tnad syntiat kam shym la ioh jingtip eiei ia katei ka jingwan tur ka HYC kaba la poi haduh Secretariat.
