Ym tang ba ngi kem runar, hynrei ki kam bhalang ruh, ong u SP

Shillong, 6 Nohprah:
U Superintendent of Police (SP) ka East Khasi Hills u Bah Mariahom Kharkrang u la ong ba ki pulit kim dei kiba nang tang ban kem ia ki runar hynrei ki dei ki para briew kiba im ha ka imlang sahlang.
Haba kren mynta ka sngi, ha ki khynnah baduk ba raitoi ba la lum lang da ka Shillong Reach Ministry ryngkat ka jingiatreilang bad ki pulit ka East Khasi Hills ha Police hospital kaba don ha Khyndai Lad, hajan Sardar Police station.
U Bah Kharkhrang u la ong ba ki pulit ki dei ki briew bad kim dei tang kiba nang ban kem ia ki runar ne ki riew bym man hynrei ki don ka dur briew kumba long baroh.
“Ngi kum ki pulit nalor ki kam ba ngi iakhun pyrshah ia ki kam bymman, ngi dei ki briew kumba long kiwei pat ba donkam ia ka imlang sahlang”, la ong u SP.
U la ong ruh ba ka jingpynlong ia kane ka jingialang kum ka jingleh kam isynei ia ki khynnah ba duk ba raitoi, la leh ryngkat ka jingiatreilang bad ka Shillong Reach Ministry ba la ialam da u Pastor Roben.
“Ngi kwah ban pynbna paidbah ia kane namar ba ka Shillong Reach Ministry ka leh ia ki kam isynei iarap ia ki khynnah ba duk da kaba shu ioh jingiarap na ki nongsynniang hynrei da kaba iatip paidbah,ki briew ki lah ban wan ai jingiarap shuh shuh sha kane ka Balang ba kan lah ban leh kham bha”, la ong u SP.
Ka Dr C Khonglah kaba leh eksamin ia ki khynnah ha katei ka Police Hospital ka la iathuh ba la dep eksamin 25 ngut eiei ki khynnah bad katkum ka jingshem, ka jingkoit jingkhiah jongki kam da long kaba sniew hynrei ka biang lait noh tang ba ki don ka jingpang jyrhoh bad baiong khlieh.
Ha kane ka janmiet, na ka liang u SP Bah Kharkhrang u la sam jingbam sha ki khynnah, ba la don lang u SP (city) Bah Vivek Syiem, u OC ka Sardar u Singh.