Shillong: Ka Thangkharang Park bad ka Khohramhah ki dei ki jaka jngohkai kiba pawnam bha ha ka thaiñ Sohra, ha ki snem kiba la leit noh bad ha kitei ki 15 ne 20 snem mynshuwa haba ki nongjngohkai pyrthei, ki ong ban leit Sohra ka mut ba ki leit sha Thangkharang, Khohramhah ne sha Nohkalikai kiba dei ki jaka jngohkai kiba la rim bha ha Sohra.
Hynrei la iathuh ba ha kine ki khyndiat snem ka jingwan ki nongjngohkai ka la hiar bha sha kitei ki thaiñ bad ki don sa tang katto katne ngut kiba wan. Ka daw ka jinghiar ka kam jngohkai ka dei na ka jingsniew palat ka surok, iathuh ki nongshong shnong katei ka thaiñ. Ki la iathuh ba haba ki briew ki wan jngohkai ia ka Sohra ka lynti jong ki ka kut tang ha Nohsngithiang bad kim nud shuh ban hiar kham sharum namar ka surok ka la sniew palat.
Ki nongdie dukan haba ia kren bad u nongthohkhubor: Rupang.
U nongthohkhubor u la ioh ban ia kren bad uwei na ki nongshong dukan ha Thangkharang u bah Starling Rynga bad u la ong ba ka jingwan poi ki nongjngohkai ka la hiar bha mynta ban na kaba mynshuwa. Ha ka thaiñ Sohra baroh kawei u la ong ba ki don kumba 500 ne 600 tylli ki kali ba hiar manla ka sngi, hynrei kiba poi ha Thangkharang ki long tang kumba 50 kali eiei shisngi bad don ba duna ruh ia kata.
Kawei pat ka longkmie kaba shong dukan ka kong Letcydora Warjri ryngkat ka kong Bashaimon Allya, ki la iathuh ba ki la shong dukan naduh ba la sdang ia ka Thangkharang Park ha u snem 1993 bad ki ju im kamai nangtei hynrei mynta ki ong ba ka la ktah bha namar ka jingbym treh wan shuh ki nongjngohkai sha katei ka jaka. Ha Khohramhah u rangbah ba peit ia katei ka jaka jngohkai u la ong ba ym don shuh ba wan sha katei ka jaka mynta lada don ruh tang iwei ne ar tylli ki kali ha ka shisngi bad teng teng ym ju don briew ruh. Ka Khohramhah mynta ka la shu sah khongreng bad kam don satia ka jingpynbha ia ka naduh ki surok, ka jingpynbha ia ki jingker kynroh bad kiwei.
La sngewthuh ba ka jinghiar ka kam jngohkai sha kitei ki jaka , kam shym la dei na ka daw ka jingkiar ki nongjngohkai hynrei ka daw ka dei namarba ki kali kiba kit ia ki nongjngohkai kim treh ban leit sha kitei ki jaka ba la sniew palat ka surok. Ha Thangkharang Park u Rupang u la ioh ban ia kren bad u bah Jeremaia Janong u nongkamai kali uba shong basah ha Mawlai uba ju kit ia ki nongjngohkai na Guwahati ban wan ialam sha Sohra.
U la ong ba lada kit nongjngohkai sha Sohra ka la don lypa ka dor ba ki shim, hynrei kim treh ban hiar sha Thangkharang, Khohramhah ne Nohkalikai lada ki Tourist kim treh ban siew tam ia ka dor na kaba lah ia kut. U bah Lamphrang Lyngdoh u nongkamai kali uba shong basah ha Pynthor u la ong ba ki nongjngohkai kim tip lut ia ki jaka jngohkai kiba don ha Sohra bad ka shong ha ki nongniah kali ban ialam ia ki, kumta u la ong ba la ialam tang sha ki jaka ba bha surok hynrei kiba tip pat lada ki kwah kin hap siew tam ia ka dor.