Shillong:U Myntri ka Sorkar Pdeng ba dei peit ia ki kam rep bad ka bha ka miat ki nongrep, u Radha Mohan Singh u la leit jngoh ia ka jaka rep ha Shillong ha kaba ym shym la pyndonkam ki dawai dashin (organic farming). Kane ka jaka rep kaba don kumba 4 hectare ei ei kaba la pyniaid da ka Lawsohtun Farmers Association ha kaba kumba 20 tylli ki longiing ki peit ia ki kam ki jam baroh.
Une u Myntri u la iakren bad ki nongrep ha kane ka jaka bad u la iaroh ia ka jingtrei shitom jong ki ban rep khlem da pyndonkam ia ki dawai. U la ai mynsiem ruh ia ki, ba ki pyniar ia kane ka rukom thung jingthung ha kiwei kiwei ki jaka. U Myntri u la ong ruh ia ki ophisar sorkar jylla ba kin ai jingiarap katba lah ia ki nongrep kiba kwah ban rep ha kane ka rukom. U la ong ruh ba ka sorkar pdeng kan ai ka jingiarap kaba donkam khnang ban kyntiew ia kane ka rukom rep khlem ber dawai ha Meghalaya.
U Myntri u la peit ia ki kam ba la pyntrei da ki tnat Agriculture, Animal Husbandry, Veterinary bad kiwei kiwei pat ha ka jingialang bad ki ophisar. Ha kane ka jingialang ba la pynlong ha Raj Bhawan hynnin ka sngi, une u Myntri u la peit bniah ia ki scheme jong ka sorkar pdeng ba la pyntreikam ha ka jylla kiba iadei bad ka bha ka miat jong ki nongrep.
U la hukum ia ki ophisar jong kine ki tnat ba kin pynthikna ba kine ki scheme kin poi sha ki briew kiba donkam ia ki ha ka por kaba biang. U la ong ba kane kan ialad ia ka sorkar ban pynurlong ia ka jingthmu jong ka ban kyntiew arshah ia ka ioh ka kot jong ki nongrep shuwa u snem 2022.