Pynkhreh kiew Kashari ka KHADC pyrshah ia ka Municipal

Shillong, 6 Nohprah:
Ka Khasi Hills Autonomous District Council (KHADC) ka la pynkhreh ban kiew iinglieh iingsaw pyrshah ia ka Shillong Municipal Board (SMB) halor ka jingpynkhein jongka ia ka hukum ka Supreme Court da kaba bthah ia ki nongshong dukan kiba don hapoh u pud u sam ka KHADC ban pan license na ka Municipal.
U Chief Executive Member (CEM) ka KHADC u Bah Pynshngainlang N Syiem u la ong ia kane hakhmat ki nongialam na ki shnong bapher bapher ba la ialam da u Chairman ka Advisory Committee Administrative Reform (ACAR) ka KHADC uba dei ruh u MDC ka Laban u Bah Sanbor Shullai. U Bah Shullai u la kyntu ia ka KHADC ban tuklar ia ka jingtam pud ka SMB hapoh ki jaka jong ka Council.
Hapoh ka jingialam u Bah Shullai, la ujor ha u CEM ka KHADC ba ka Municipal ka la tam pud da kaba bthah ia ki nongshong dukan ban shim license wat ha ka jingshisha ki dei hapoh u pud u sam ka jingpeit ka KHADC.
Katkum ka jingong u Bah Shullai, u CEM u la kular ba un peit bad bishar bniah ia ka jingujor jongki, wat ban leit syndon sha ka Kashari ban ujor pyrshah ia ka SMB. U la ong ba u CEM un thoh sha u Chief Executive Officer (CEO) ka SMB ban bthah ba u dei ban weng noh ia ka jingbthah ban leit pan license na ka SMB ha ki jaka ba hap hapoh u pud u sam ka KHADC.
U Bah Shullai u la ong ba kane ka dei ka sien kaba lai ba ka SMB ka la leh ia kane ka kam knieh pud bad kane ka long pyrshah ia ka rai jong ka Supreme Court jong u snem 1999.
Kham mynshwa ruh, ka la tam pud ha u snem 2006 bad 2011 hynrei ka la kynran dien noh hadien ba ka Council ka la pyneh.
Ha ka hukum ka Supreme Court ha u snem 1999 ba la ujor da ka Non Tribal Youth Union (NTYU) pyrshah ia ka KHADC, ka Kashari ka la ong, ba ka Shillong Municipal Board ka dei tang ka nongpynkhuid, ban peit ia ka koit ka khiah, hynrei kam don bor ban pan license na ki nongkhaii hapoh u pud u sam ka KHADC kaba la pynkup bor katkum ka ‘United Khasi Jaintia Hills District (Trading by Non Tribals) Regulation Act 1954 bad 1959 kumba la pynkup bor ha ka Sixth Scheduled ka riti synshar ka ri. Ia ki riewlum la pynlait noh na kane ka ain ha kaba ki lah ban khaii khlem donkam trading license.