Shillong:U bah Joannes JTL Lamare na Kynton U Mon, Laitkor u la ujor sha ka myntri ka tnad iada ri ka ri India pyrshah ia ki shipai Assam Rifle kiba don ha Laitkor. Ha katei ka shithi u bah Lamare u la ong ba ha ka miet 24 tarik mynta u bnai ha ka por 8:43 baje mynmiet, katba ma u bad ki paralok ki dang iaid lynti da ka thuk thuk lyngba ka surok PWD kaba pyniasoh ia ka Umiew, Pomlakrai bad Kynton U Mon, Nongkrem ha ka por ba ki wan phai na ing ki paralok, ki don 3 ngut ki shipai kiba la bat ia ki bad kren da ka ktien hindi bad u la ong ba imat ki dei kiba la bu-aid bad kitei ki la thlia ia ki bad ka la jan poi ruh sha ka jingiakynroi ia shoh.
U la ong ba katei ka dei ka surok PWD, hynrei ki shipai ki ju pynthud ia ki paidbah kiba iaid lynti nangtei bad kane ka jia na ka por sha ka por. U la ong ruh ba ki shipai Assam Rifle ki ju mlien bha ban kynthih na kyrpong ing ki briew bad na jaka jong u ruh bad ki la pynjulor ia ki jingthung jong u kiba don ha kper bad haba ia kren ki kren khor pynban da ka ktien Hindi jong ki. U la dawa ba ka tnad iada ri ka dei ban leh eiei ia kitei ki shipai bad ban leh ruh ia kaba donkam khnang ba ki shipai Assam Rifle kiba don ha Laitkor kin ym nud shuh ban leh khlem akor ia ki paidbah ba iaid lynti bad ba kin sangeh ka rung tuh sha kper ki briew.