Shillong:Ha ka jingkren ai khublei jong u ia u chairman ba dang shah jied thymmai ka KHADC bah Teinwell Dkhar, u MDC ka PDF na Mawkyrwat u bah Hadrian Lyngdoh u la phla hapoh ing dorbar ba u la shah kren khlem akor da ka mesej Mobile ha uwei u nombar u bym shym la ithuh satia la u dei u nombar jongno.
U bah Hadrian u la ong ba utei u nombar 7005635969 u la ioh ar tylli ki Miss Call na utei u nombar ha ka 13 tarik ha ka por 1:22 bad 1:23 Am bad ha katei ka por u la thiah, hynrei kham sa shiphang u la ong ba u la iohi ba ka wan da ka mesej, kaba tim ia u da ka sih ka sang. U bah Hadrian u la jubab da kaba ong Thank You Sir. Haba kylli balei ba u jubab Thank You sir u la ong ba u nangmut ba ka dei ka mesej ai khublei ia u, namar ba u peit bad ka shoh samthiah hynrei dei mynstep ba u iohi ba ka dei pynban da ka jingtimsih.
Ia katei ka mesej, u bah Hadrian u la pyni ruh sha u Rupang bad la iohi ba ka don ka kyntien timsih kaba shi kyntien kaba la thoh ‘Hadrian Drain ……..( kaba dei ka timsih)’. U bah Hadrian u la kyrpad ia ka ing dorbar ba kan leh eiei halor katei ka jingshah timsih jong u kum u dkhot jong ka ing dorbar, hynrei u Chairman u bah Teinwell u la ong ba katei ka kam ka dei shabar jong ka ing dorbar bad u la ai jingmut ia u bah Hadrian ba un shu ujor da ka FIR, hynrei haba ia kren pat bad u bah Hadrian hadien ba la wai dorbar u la ong ba un rah ia kane ka kam sha ka Party ban ia kren.