Naduh lashai ka pakhang surok, ba lai miet kynthih Pynkhreh ki jingiakhih ba kham jur, ong ki Sengbhalang

Shillong,2 Nohprah:
Ki Sengbhalang ki la bteng biang ia ka jingiakhih jong ki da kaba sdang shuwa da ka pakhang surok miet kaba lai miet kynthih kata ha ka 4,5 bad 6 tarik. Katei ka pakhang surok miet kan sdang naduh ka por 9 baje mynmiet haduh ka por 5 baje mynstep.
Ki sengbhalang lyng ba u vice President ka KSU u Bah Fredrick Kharmaw phlang u la iathuh ba kane ka jingiakhih da ka pakhang surok miet kaba lai miet kynthih ka dei ka jingiakhih ba ki sengbhalang ki la pynjynsur, namar ki eksamin bapher bapher jong ki khynnah pule. U Samla Kharmawphlang u la pyntip ruh ba ki sengbhalang ki la dep pynkhreh lypa ia ki jingiakhih , kaba kim pat pyntip lypa, hynrei ki la ong ba ka lah ban long ha kano kano ka dur ruh, bad ki la iathuh ruh ba tang shu kut ka eksamin ki khynnah kin pynbna da ki jingiakhih kiba jur khnang ban pynbor ia ka sorkar ban pyntreikam noh ia ka ILP.
“Jia katba jia ngi lah pynkhreh lypa ki jingiakhih kiba jur tang shu kut eksam ki samla pule , katta ka sorkar ka dang kuman katta ngin nang pynjur arshah laishah sawshah ki jingiakhih, namar kane kadei ka jingialeh ka jingdawa jong ki trai muluk ban lait na ka jinglong mraw bad ka jingshah tyllep ha ki bar jylla. Ko sorkar sngap ia ka sur u paidbah bad pyntreikam ia ka ILP, lym kumta ka ding ba shyrkhei kan klang hapoh ka jylla hi baroh kawei bad lada jia kumta ka sorkar hi ka hap ban shim ia ka jingkitkhlieh” la ong utei u nongialam ka KSU.
Shuh shuh ki sengbhalang ki la kyrpad sha ki paidbah ba kin long kiba iaishah namar ba ban poi sha ka thong hap ban ia kynduh ia shibun ki dieng pyng kiang bad ki mawjynthut kiba pyrshang ban khanglad hynrei suki suki yn sa poi hi ka por ban ioh ia kaei kaba ki paidbah ki kwah kumba la sawa ka sur ha Madanstudent ha ka 30 tarik u bnai ba la dep.