Jah ka ksiar, T.63hajar ha iing dak

Shillong, 2 Nohprah:
Uwei u Rangbah u la ujor sha ka Consumer Forum hadien ba u phah ia ka song ba la thep ia ki ksiar ki ksah, ki jain ki nep (khasi nara) lyngba ka speed post na ka post office Rynjah kim shym la poi sha ka jaka ba la phah.
Haba kren mynta ka sngi bad u Bah Benal Lyngdoh basah ha Umpling u la ong ba u la phah ia ki song sha ka khun jong u sha Bangalore ha ka 12 tarik u Jylliew 2013, hynrei kitei ki song kiba shongdor kumba T.63 hajar eiei ki lah jah khlem poi satia sha katei ka jaka ba u la phah.
U la ong hadien ba ka song jong u kam shym poi u la leit ban ujor sha ka post office hynrei kaba sngewsih ka long ba na ka liang jong ki, ki la ong ba ia ki tiar ki tar kim lah siew ne ban pynioh ia ki hynrei ki shu siew tam ia ka dor bai phah speed post kaba long T. 314.
“Hadien kane ngam banse ban leit ujor noh sha ka Consumer Forum ban dawa ia ka hok”, la ong u Bah Lyngdoh bad u la bynrap shwa ba un leit ujor sha Consumer Forum u ladep ujor shwa sha ka post office Rynjah ha ka 18 tarik u Jylliew .
U Bah Benal u la ong ba mynta u dang ap tang ia ka rai na ka Consumer Forum. La ong ba ka rukom treikam jong ka post office ka long kum ha kane ka rukom kane ka lah ban pynduh jingshaniah ia ki briew.