‘Ma ngi iai ialeh ma ngi ym sangeh’ ong u nongialam na Garo

Shillong,1Nohprah:
Ka jingialang ILP ha Madan Student kam dei tang ka jingialang kaba la wan bana pynshai paidbah tang ki nongialam sengbhalang jong kane ka ri Lum Khasi Jaitn tia hynrei ki la don ruh haduh kumba saw tylli ki seng kiba la wan na Ri-Lum Garo.
Haba ai jingkren kum ki nongialam sengbhalang u President ka Achik Youth Welfare Organisation u samla Adinson Momin u la bitar ia ka sorkar kaba la shu mynthi ia ka jingdawa ban pyntreikama ia ka ILP kaba la dawa haduh lai bnai kynthih. U la ong ba ha ka jaka bana pyntreikam ia ka ILP ka sorkar ka la wanrah pynban ia ka Tenancy bill, ‘ngi pan da u mawlynnai –da ka ksiar ka sorkar ka aid a ka sarang’ ong u samla Adinson uba la pynpaw ba ka jingwan kyrshan ki paidbah kam dei namar ka jingdawa ki sengbhalang hynrei ka dei ka jingdawa jong ka jaitbynriew Khasi ,Jaintia bad Garo ia ka ILP. ‘Ma ngi iai ialeh-ma ngi ym sangeh’ pyrta utei u samla Garo ha ka ktien Khasi.
La ioh ruh ki jingkren na u President ka GSU u Tensak uba la ong ba ai ba ka sorkar kan tip ba kane ka jingiakhih kam dei ka jong ki sengbhalang hynrei ka dei ka jong ka jaitbynriew ba ka donkam ia ka ILP. ‘Ngin ia aireng bad ka sorkar-ngin bteng ia ka jingiakhun jong ngi haduh ban da ioh ILP’ ong utei u samla.
Kiwei pat kiba la ai jingkren ki long u General Secretary ka RBYF u Bah L.Sawkmie uba la ong ba ka shuwa ban pynlong ia katei ka jingialang ka la don ka jingsngewdiaw bad ka jingsngew artatien hapdeng ki sengbhalang bad ka la don ka jingiakren hapdeng jong ki –shano kane ka iakhih ILP kan poi , hynrei ka jingwan u paidbah uba la pyndap mam ia ka madan student ka la i mynsiem ia ki sengbhalang ba kin iaid shaphrang ha ki jingiakhih.
Ka General Secretary ka KWADDA ka kong Margret ka la ther tyngeh ia ka sorkar da kaba ong ba ka dei ka sorkar kaba kyllut bad kaba matlah , haba la pana da ka dohkha ka ai pynban da u bsein. Ka la iathuh ruh ba ka jingiakhih ILP ka dei naduh u snem 1979 lyngba ka Satyagraha ka TWADAM. La ioh ruh ki jingkren lyngkot na u President ka JSU u Bah Rikut, President JYF u Bah P.Majaw, u President ka Association for Democracy Empowerment na Ri Lum Garo u D.Momin, Vice President ka AJYWO u Bah Commander Sana. La pyniaid ia ka jingialang da u samla Auguster Jyrwa, General Secretary ka KSU Central Body.