Ap ktem ki pulit tap khmat ha ophis KSU Jaiaw, thwet ia ki nongialam

Shillong, 29 Naiwieng:
Ki pulit ka nongbah Shillong ki la thwet tyngeh ia ki nongialam seng bhalang kiba don bynta halor ka jingiakhih ban dawa pyntreikam ia ka Inner Line Permit (ILP) ha ka jylla bad mynta ka sngi ki pulit tapkhmat kiba riam jain iong naduh dangstep ki la leit ban ap ktem ha surok Jaiaw ha lynti ban leit sha ophis jong ka Khasi Student Union (KSU).
U nongaikhubor u la iohi ia ki pulit riam iong kiba tap durkhmat ialade kiba ap ha surok ban leit sha KSU Jaiaw nadduh ka por 10 baje mynstep bad haduh ka por 1 baje noh phai sngi ruh ki dang don ha katei ka jaka bad na ka liang jong ki pulit ki la pyrshan ban thwet tyngeh na ka bynta ban ioh kem ia ki nongialam jong ka KSU bad kumjuh ruh ia kiwei pat ki nongialam sengbhalang kiba donlang ha ka kynhun jong ki 14 tylli ki sengbhalang.
Na ka liang jong ki sengbhalang lashai ka sngi kin pynlong ia ka rally ha madan student ha kaba ki nongialam jong ki 14 tylli ki sengbhalang kin ai jingshai halor ka nongrim ba ki sengbhalang ki ieng na ka bynta ban dawa pyntreikam ia ka ILP ha ka jylla bad lah ruh ban kdew hangne ba na ka liang jong u Mukul Sangma hynnin ka sngi u la ong ba ym donkam ban kem ia ki nongialam lashai ka sngi kiba la dep shah ujor mukotduma halor ki jingjia bapher bapher ha ka nongbah. Hynrei mynta ka sngi na ka liang jong ki pulit ki la pynlong ia ka jingkhynra kaba tyngeh na ka bynta ban iohkem ia kitei ki nongialam.
Lah ruh ban kdew hangne na ka liang jong ka seng ki nongniah taksi ki la shim ia ka rai ban sangeh kamai lashai ha ki kynta long jingialang kum ka dak ban ai jingkyrshan ia ki sengbhalang bad na ka liang jong ki nongshong iew pat ki la shim ia ka rai ban nym plie ia ka iew khnang ban lait na kino kino ki huri hura kiba lah ban mih namar kane ka jingialang jong ki sengbhalang.