9tylli ki shnong, ki iashim bynta ha ka elekshon Assam Dei ki shnong jong ka Hima Nongspung

Shillong, 26 Naiwieng:
U Sordar ka shnong New Balakhawa mynta ka sngi u la ujor sha ka Myntri kam pohiing Ka Kong Roshan Warjri ba dei ban kem ia ki Rangbah shnong ki ba la ai jingbit bad shah ban pynlong ia ka elekshon jong ka sorkar Assam.
U Sordar katei ka shnong u Bah Micheal War jri mynta ka sngi ha ka dorkhas ba la ai ha ka Myntri u la ong ba dei ban kem mardor ia ki Rangbah shnong kiba la shah bad ai jingbit ia ka sorkar Assam ban pynlong ia ka elekshon hapoh ka jylla Meghalaya.
Ha ka dorkhas ba la ai sha ka Myntri la ong ba ka sorkar Assam ka la wan tur pud ha kane ka jylla Meghalaya da kaba wan ban pynlong ia ka Elekshon Rabha Asong Autonomous Council ha ka 16 tarik u Naiwieng ha kaba baroh ki shnong kiba hap hapoh ka Hima Nongspung Ri Bhoi District ki la iashim bynta hapoh ka jingialam jong ki Rangbah shnong.
Ki shnong kiba iashim bynta ha katei ka elekshon ki kynthup ka shnong Balakhawa, Lyngkhung, Howla, Jimnigoan, Harhel, Patgoan, Ranibari, Bernongsai, Bilpara. Tang ka shong Akhonijira bad ka New Balakhawa ki bym shym la shim bynta ha katei ka elekshon.
Ha ka jing ujor ba la ai ha ka Myntri kam pohiing Kong Roshan Warjri u Sordar Micheal Warjri u la ong ba kiba pyniaid ia katei ka elekshon ki la wan tah ia ka poster ha ka shnong Balakhawa. Ia kane ka poster la aiti lang ha ka Myntri.
U Sordar New Balakhawa shuh shuh u la ong ruh ba ha shnong Balakhawa bad Bernongsai ka Assam mynta ka la wan ban ban buh paip um PHE khlem ka jingbit na ka sorkar Meghalaya.