Kubur u Mukul ba don kti ki politishian bad ki lehnoh

Shillong, 26 Naiwieng:
Tang shi sngi ba ka liangpyrshah ka Meghalaya People’s Forum (MPF) ka la ujor ha u Lar ka jylla ia ka jingdonkti ki politishian bad ki lehnoh ha ka thain Garo Hills, u Myntri Rangbah ka jylla u Mukul Sangma u la kubur ba ka jingiadon kti ki lehnoh bad ki politishian ym lah ban kyntait.
Haba kren sha ki nongthoh khubor hynne ka sngi hadien ba la wai ka jingialang bad ki nong mihkhmat na ka 14th Finance Commission ha nongbah, u Mukul u la ong ba ki bor ka ain ki donkam ban peitngor bha bad ban pynshisha ia kane ka jingdonkti ki lehnoh bad ki politishian.
U la ong ba ka sorkar ka don ki jingtip ia ka jingdonkti ki politishian bad ki lehnoh ha ki snem ba la dep kaba la pynlong ia ka sorkar ban peitngor ban pynshisha ia kane. U la ong ba ki pulit kin pynlong ia ka jingtohkit halor kane ban ioh ia ka jingshisha.
Ha kane ka sngi Nyngkong, ka MPF ka la aiti ia ka dorkhas ha u Lat ka jylla u KK Paul da kaba kdew ba nalor kiwe pat ki pat, ka jingiadonkti jong ki politishian bad ki lehnoh ka long kaba dei ban pynlong ia ka jingtohkit.
U Mukul u la ong ba ki politishian na kano kano ka seng sain pyrthei ki lah ban don ka jingiadei bad ki lehnoh bad ka donkam ban pynshisha ia kata shwa ban ioh ia ka jingpynkut mano na kita.
U la kular ba uno uno u politishian uba donkti bad ki lehnoh, yn nym aili hynrei ka ain kan trei beit shi syndon pyrshah ia ki lada lap shisha.
Ka MPF ka la ong ba la don ki sakhi halor ka jingsuba ia ka jingdonkti ki lehnoh bad ki politishian ha ka thain Garo Hills bad bunsien ki lehnoh ki ioh jingtip shwa ba ki pulit kin leit ban poi ha kano kano ka jaka haba ki leit khynra.