Paw ba iapher jingmut ka HSPDP halor u kyrtong MP

Shillong, 25 Naiwieng:
Ka HSPDP ka la paw ba ka don ka jingia pher halor u kyrtong jong ka Peoples Candidate Forum (PCF) u Rev PBM Basaiawmoit na ka bynta ka elekshon Lok Sabha na Shillong Parliamentary.
Katto katne ki nongia lam ka party ba ialam da u vice president Bah Ardent Miller Basaiawmoit ki la pynbor ia u president Bah Hoping Stone Lyngdoh ban kyrshan ia u Rev Basaiawmoit.
Nalor ka jingpynbor, u Bah Lyngdoh u long skhem beit ba ka party kam pat shim ia kano kano ka rai ban kyrshan iano iano ha kane ka elekshon Lok Sabha.
‘Nga la iakynduh ia u marwei ia u Rev Basaiawmoit bad nga kylli la un iakhun ne em na kaparty. U la kyntait u la kyntait da kaba ong ba ngam iadon bynta suh bad ka HSPDP,” la ong u Bah Hoping ha ka jingiakren ha kane ka sngi Nyngkong.
U Bah Lyngdoh u la ong, ” Kam don kano kano ka jingpynshisha ban kyrshan iano iano uba kyntait ban iasoh bad ka party”.
U president ka HSPDP u la ong ba ka Election Committee (EC) ka party dang shen ka la thaw bad kan sa ai ia ka rai halor kane.
Hynrei ka khubor bym pat shai bha, ka la ong ba u Bah Hoping u kwah ba ka Kong Finela L Nonglait kan long kum ka kyrtong na ka Shillong Parliamentary.
Hynrei, na ka liang ki nongialam ka party kim sngew hun ia kane ka jingkwah jong u Bah Hoping.
Hynrei kaba sngew kyndit ka long ba bun ki nongialam ka party hadien ba la tip ia ka jingleit iakynduh ki nongthoh khubor ia u Bah Hoping ha iing sah jongu, ki la pyrshang ban khang lad ia u Bah Hoping ban iakren ia ki nongthoh khubor.
Ki nongialam jong ka party ki la ong ba ka party ka la shim ia ka rai ban kyrshan beit ia u Rev Basaiawmoit.