Dawa ka KSU ban sangeh khlong maw na ka wah Lukha

Jowai, 25 Naiwieng:
Ka wah Lukha kaba la shah ktah naka jingkylla bih ka um ha kane ka wah, kala shah pynjot ruh na ka jingkhlong tuh ki briew ia u shyiap bad ki maw na kane ka wah. Ki riewkhwan myntoi kila khlong ia ki maw naka wah Lukha khamtam haki bynta hapdeng ka shnong Kuliang bad Borsara kaba don ha khappud ka India bad ka Bangladesh.
Haka jingleit jurip jong ka KSU Narpuh Circle bad u H.H.Mohrmen ha ryngkat ki nongpathai khubor la lap ba ki briew ki lum thup iaki maw ha kane ka wah khnang ban ioh die ia ki. La lap ba la die ia ki maw sha ka CEC ka company kaba shim kontrak ban shna iaka jingkerkynroh ia u pud ka India bad ka Bangladesh bad kumjuh ruh la shalan ia ki maw sha Assam.
Kane ka jingkhlong iaki maw kala pynsniew iaka wah Lukha ha kaba ki thwei kila duh lut bad ka wah kala kylla madan ploin bad ym don jaka shuh iaki dohkha dohpnat bad kin im la ong u ma Puson Kympad uba long u Assistant Secretary Shnong Kuliang. U ma Kympad ula ong ruh ba namar ba ki briew kila die lut iaki maw naka wah, ha kip or lyiur ki maw baroh ba ka um ka wan rah ki shah rong lut sha Bangladesh kumta kane ka long ka jingduhnong iaka jylla hi ruh. U ma Kympad ula ong ba naka liang jong ka shnong ruh kila pyrshah iakane ka jingleh jong ki nongkhaii hynrei kim patiaw satia.
Haba ki nonglum khubor kila kylli la ki nongdie kila ioh bor ne em naka tnat Forest ka jylla ne naka tnat Forest jong ka Jaintia Hills Autonomous District Council (JHADC) ban khaii ia ki maw na kane ka wah, ka jubab ka pynshisha ba ki nongkhaii ki leh tuh khlem ioh jingbit naki bor ba dei khmih.
U Secretary jong ka KSU Narpuh Circle u Kwill Siangshai, haba kren bad ki nonglum khubor ula ong kane ka jingleh beain kala sdang naduh ka snem 2012 bad naka liang jong ka seng kila ai jingujor pyrshah ia kane sha ki bor distrik ha Khliehriat, hynrei ki bor distrik ha Khiehriat kim pat leh eiei ruh halor kane. U ma H.H. Mohrmen haba iakren bad ki nongai khubor ula ong ba ki bor district kila dei ban shimkhia ia kane namar ba kala don ka jingkhang ban khlong maw naki wah kaba la hokum da ka National Green Tribunal (NGT).
Naka liang jong u samla Phan Khonglah uba long u vice president ka KSU Narpuh circle ula ong ba ka seng kan iakynduh biang bad ki tnat khlaw bad kumjuh ruh ki bor district ha Khliehriat ban dawa ba kin khang syndon iaka jingkhlong maw naka wah Lukha khnang ban iada ia kane ka wah.