Hiar thma ki runar ia arngut ki Rangbah Shnong, iap 1 & mynsaw jur 1

Jowai, 25 Naiwieng:
Ka Jaintia Student’s Union (JSU) Nongjngi Khliehshnong Unit ka pynrem jur ia ka jing pyniap dusmon ia u Elington Pale u ba bat ruh ia ka kam Rangbahshnong jong ka Nongjngi Iongthma. Na ka liang ka Union ka la pynrem jur iaka ne ka jing jia kaba la wan rah ia ka jingkhlad ha shen jong u ne u rangbah shnong bad ka ne ka dei tang ka kam ki riew khlaw ne ka kam ki thrang snam ki bym khein snep wat ban shim ia ka jing im briew.
Shuh shuh ka seng ka kyntu ia ki bor ba dei ban khmih ia ka ain ba kin kem mardor ia ki briew ki ba don kti bad ai da ka jing saja kaba tyngeh ia ki nong leh kam bymman.Ka ne ka jingjia ka la pynpar niangkhriat bad pynma ia baroh ki briew jong ka thain.Shuh shuh ka Union ka bthah ia baroh ki rangbah shnong hapoh Nongjngi kumjuh ruh ia ki nongshong shnong ba ki dei ban long ki ba adkar bad ban ym ai lad ia kum ki ne ki jingjia ki ba wan rah ia ka jing bym shong shngain ha ki shnong ki thaw kumjuh ia ka thain hi baroh ka wei, pynkut ka kyrwoh na u President Nongjngi Khliehshnong Unit Kermi o Samati.
Ha kawei pat ka khubor, na ka liang jong Ka Khasi Students’ Union Jalaphet Unit kala pynpaw iaka jingpynrem jur iaki runar kiba donkti hakaba pom pynmynsaw ia u Rangbah Shnong ka Jalaphet Bri Sumer East Jaintia Hills District haka 22 une u bnai.
’Ngi pynrem jur iaki runar kiba pom bad dung pynmynsaw ia u Rangbah Shnong jong ngi hakaba kim don shuh kata ka mynsiem jingiatiplem bad ki bymdon ka jingsngew para briew shuh’ la ong u Samla Emmon Chyrmang President KSU Jalaphet Unit.
Lah ban pynkynmaw ba ia utei u Rangbah Shnong ka Jalaphet Bri Sumer la pom bad dung pynmynsaw daka kynhun jong ki 5 ngut ki riew runar kiba la wan daka Maruti Gypsy katba u dang don ha lynti daka Maruti Alto haka shnong Moopala.
Katei ka jingjia kala jia haka 22 tarik une u bnai. Utei u Rangbah Shnong ula don hapdeng ka jingmynsaw kaba jur bha bad mynta udang thiah haka Hospital Woodland Shillong.
Naka liang ka KSU nakatei ka Shnong ka dawa jur naki pulit bakidei ban kem mardor ia kiba donkti bad ha kajuh ka por naka liang katei ka Seng ka kyntu iaki bor ka ain bakin nym ai jamin shuh iakitei ki runar lada ki shah kem pynkut ka kyrwoh naka Seng.