Hapoh 4taiew, hukum ka High Court ban leit hajir ki kompeni dewbilat Kynnoh ka JYF, ba ki pynjot mariang sha Jaintia Hills

Shillong,
25 Naiwieng:
Ka Jaintia Youth Federation JYF Central Body hadien ba ka la ujor ha Guwahati High Court, hynrei na ka liang katei ka kashari, ka la phah noh ia ka ne ka mukotduma sha Meghalaya High Court, namar ka dei ka mukotduma ba hap hapoh ka Jylla. Ha ka jingbishar, kaba mynta ka sngi, halor ka jing ujor jong ka JYF, pyrshah ia ki kompeni dewbilat, kiba ieng be-ain ha ki jaka khlaw da ka jing ai jingmynjur pathar jong ka sorkar.
Na ka liang jong ka High Court jong ka Jylla, ka ba la khot ia ka jingbishar, ka la pynmih ia ka hukum ban khot hajir ia baroh 9 tylli ki karkhana pynmih dewbilat kiba treikam khlem jingbit na ka Sorkar Pdeng da kaba pynkhein ia ka ain (Forest Conservation Act, 1980, Environment Protection Act, 1986, the United Khasi & Jaintia Hills Autonomous District (Management and Control of Forests) Act, 1958, Meghalaya Transfer of Land (Regulation) Act, 1971) ki kynthup ia ka M/ S Star Cement, M/ S Topcem, M/ S Taj Cement, M/ S Best Cement, M/ S Green Valley Industries (P) Ltd, M/ S Amrit Cement Industries Ltd, M/ S Adhunik Cement Ltd, Cosmos Cement Ltd bad ka M/S Goldstone Cement Ltd, ba kin leit ban ai jubab hapoh 4taiew halor katei ka jingujor jong katei ka Sengbhalang.
Kham mynshwa, na ka liang jong ka tnat pynneh mariang, jong ka sorkar India, ha ka shithi ba ka la phah sha ka Sorkar Jylla myn ha ka 22 tarik Nailur 2010 hadien ba mudui da ka Seng, kala ong “ka jingpyndonkam ia ka jaka khlaw ba rben jong ka Jaiñtia Hills da ki karkhana dewbilat khlem da ioh jingbit na ka Sorkar Kmie, ka dei ka jingpynkheiñ ia ka hukum jong ka Supreme Court bad ka Forest Conservation Act 1980.