Ka Argentina, ka la shah pynliem jah burom ha ka Croatia, hynnin ka miet, ha ka jingialehkai World Cup ha Russia, ha kaba ka Croatia, ka la ioh thep 3-0 ha katei ka jingialehkai jong ka Group D, ha ka Nizhny Novgorod Stadium.
U Cabalerro, uba bat ia la khlieh, hadien ba ula kum shut bakla ia ka bol bad ailad ia ka Croatia ba kan thep kol.
Ka kol kaba nyngkong jong ka Croatia, ka wan na U Rebic, haba u nongap kol jong ka Argentina, U Willy Cabalero, ula kum shut jem ia ka bol, kaba wan sha ka liang jongu bad katei ka la ailad ia U Rebic, ba un khyrwit ia ka bol beit beit sha ka jar jong ka Argentina.
Hadien kata, la ioh thep biang ia ka kol kaba ar da U Modric ha ka minit kaba 80, ha kaba u kawang beit na jngai bad leit rung ha ka jar jong ka Argentina, katba ia ka kol kaba lai la ioh thep da U Rakitic ha ka 90+1 minit.
Mynta ka Argentina, ka don ha ka jing artatien kaba khraw bad kata ka long ba kano kano ka liang kaba jop, ha ka jingialehkai na katei ka Group ka ban long ha ka sngi thohdieng hapdeng ka Iceland bad ka Nigeria, kumta kan ioh ban rung sha khmat bad ka Argentina, kaba don mynta tang shi point, kan hap ban leit phai noh sha la iing.
Ka Croatia, ka dei kaba wan ha khmat duh ha ka Group D, da kaba ka ioh 6 point, katba ka Argentina bad ka Iceland, ki ioh mar shi point.