Rung ka Umjer na Mawlai sha ka India’s Got Talent

Shillong, 24 Naiwieng:
Ka kynhun rwai Umjer ba na Mawlai Mawtawar, ka la ioh rung ban leit iakhun ha ka jingiakop India’s Got Talent Season-5 ba la pyniaid da ka Colors TV ha Mumbai.
Kane ka kynhun ba 7 ngut ki samla, kala mih hynnin ka sngi saitjaiñ nangne na Nongbah Shillong ban leit iasimbynta ha ka jingiakop ha Mumbai.
Ka la shah jied ha ka jingpyrshang audition ba la pynlong ha Kolkata dang shen. Ha kane ka Audition, 150 ngut kila wan pyr shang hynrei da ka sap rwai kaba tbit, ki Judge kila jied ia kane ka kynhun ban iaknieh ia ka nam lahduh jong ka India’s Got Talent Season-5.
Ka kynhun Umjer kala pynkhreh ban rwai lai tylli ki jingwai ha ka rynsan India’s Got Talent, ha ka janmiet 29 tarik mynta u bnai.
Ka Mawlai Peoples Development Forum (MPDF) ka la kitbok kitrwiang ia kane ka kynhun rwai ba kan nang jam shakhmat ha kane ka rynsan iakop ka Ri bad ban wanrah ia ka nam ka burom ia ka Jaidbynriew, ka Mawlai bad ka Jylla baroh kawei.
U President ka MPDF Bah Process T Sawkmie ula iakynduh kyrpang ia kane ka kynhun bad ula ai jingiarap ha ryngkat ka jingkyrkhu kyrdoh ba kin tyngshaiñ kum ki khlur ha kane ka jingiakop. Une u MLA barim ka Mawlai ula kyntu ia ki paidbah ka Mawlai bad ka Jylla baroh kawei ba kin iaduwai kyrpang na ka bynta kane ka kynhun khnang ba kan poi sha ka thong ka jingjop.