Shillong: Ka sorkar Jylla hynnin ka sngi ka la lum ia ka jingialang bad baroh ki kynhun niam ha ka Jylla na ka bynta ban pynneh ia ka jingsuk jingsain hadien ba la mih ka jingkynad ha ka thain Motphran ha kine ki sngi.
Ha kane ka jingialang ba la khot da u myntri Rangbah ka Jylla u Conrad K Sangma la wan iashim bynta ki kynhun niam naduh ki Balang Khristan bapher bapher, ki Hindu, Muslim, Seng Khasi, Sikh bad kiwei.
U Conrad Sangma, myntri rangbah ka Jylla, haba iakynduh bad ki kynhun niam bapher, ha ka Sngi Hat Majai, ha Shillong:CMO
Ha ka jingkren sha ki nongthoh khubor na ka liang u Conrad, u la ong ba ka jingmut jong kane ka jingialang ka long ban kyrpad ban wan lang ban wanrah biang ia ka jingsuk ha ka Jylla bad khamtam ha ka nongbah.
“Ka jingmut kam dei tang mynta ban pynneh ia ka jingsuk hynrei ha ki sngi ban wan ruh bad kyrpad ia ki nongialam niam ban duwai na ka bynta ban pynneh ia ka jingsuk”, la ong u Conrad.
U la ong ba ki nongialam niam kiba dei ki nongialam mynsiem, kin lah ban ialam ban btin ban ban wanrah biang ia ka jingsuk ha ka Jylla khlem da niew ia kano kano ka jaitbynriew.
“Baroh ki nongialam niam ki la pynpaw ia ka jingiaroh ia ka sorkar kaba la pyrshang ban kiar na kaba pyndonkam da ka bor”, la ong u Conrad.
U la ong ba na ki pulit ki la pyrshang ban kiar na kaba pyndonkam da ka bor kaba kham tyngeh watla ki la don bun bah kiba mynsaw na ka jingiatyngkhuh bad ki paidbah.
“Watla kiba bun ki pulit ki la mynsaw ki la pyrshang ban kiar na kaba pyndonkam da ka bor kaba kham tyngeh ia ki paidbah namar ba baroh ki briew man la uwei pa uwei u dei uba kordor, bad ka sorkar kan shim khia ban iada ia ki”, la ong u Conrad.
Ha kane ka jingialang la wan lang ruh u MLA ka North Shillong u Bah Adelbert Nongrum, nalor ki myntri sorkar hapoh ka jingialam u Myntri Rangbah.
Ha kawei ka liang, u Conrad u la ong ba ka sorkar ka la thung ia ka magisterial inquiry halor kane ka jingjia bad lada donkam kan thung da ka judicial inquiry ruh.
“Ngi la thung ka jingtohkit magistrrial inquiry bad lada donkam yn thung wat da ka judicial inquiry”, la ong u Conrad.
Ban ong ba ka sorkar ka phiel ne em, ka long kaba bakla kumba la kynnoh u Dr Mukul Sangma ba ka dei ka jingphiel ka sorkar.
“U Dr Mukul u la mad ruh ia kum kine ki jingjia.Kane ka dei ka jingjia kaba rit hynrei ka la heh namar kano ka daw”, la ong u Conrad.