Khyndiat sngi ka la ioh ban pynlut por hapoh phatok- District Jail ha dien ba ka la shah kem namar ka iakhih Umsawli, hynrei katei ka jingshah set phatok jong ka ka long pynban kumba u Blei u la phah khnang ban iarap iano re iano. Ka kong Agnes Kharshiing President ka CSWO, ka la lap ia ka kong Testaiphul Paliar , 26 snem karta kaba na ka shnong Domshohksoin,West Kha si ka longkmie kaba la shah beh shnong tang na ka daw ba ka la kynriah Balang na kawei ka Balang sha kawei pat. Haba kren sha ki nongthohkhubor mynta ka sngi ka kong Testaiphul ka la iathuh ba la beh shnong ia ka tang na ka daw ba ka la kynriah Balang na kawei ka Balang sha kawei pat. Ka la kynnoh ba la beh shnong ia ka ha ka 2 tarik u Naitung 2011 bad la ai ruh ia ka jingpyntip ha ka da ka bor shnong. “Ngi la rai ban beh shnong ia phi namar phi la pynkhein ia ki kyndon ain jong ka Dorbar shsnong bad phim bit shuh ban sah hapoh ka jaka ba peit ka shnong.Phi dei ban mih shisyndon napoh shnong” ka dei ka jingpyntip bad ka hukum ba ka Dorbar Domsohshoin ka la phah sha ka kong Paliar.
Hadien ba ka la shah beh shnong ka kong Paliar ka la iathuh ba kam don lad shuh da kumwei pat, hynrei ka la hap ban leit sha Nongstoin ban wad ing wai bad ka la sah wai hangtei. Hynrei hadien ba la kynriah sha Nongstoin ka la mih shuh shuh ka jingjia ba sngewsih ia ka ha kaba ka 30 tarik u Nailur mynta u snem ka la shah kem sa ha ki pulit.
Ki pulit ki la kem ia ka hadien ba ka Dorbar shnong jong ka shnong Mawthir lyngba ka jingkynshoit jong u hynmen jong ka bad u bakha jong ka ki la ujor ba ka dei ka nongpynkulmar shnong. Ka kong Paliar ka la iathuh ba katei ka jingkynshoit jong u hynmen jong ka, ka dei tang namarba u kwah ban klun ei ia ka wei ka jaka jong ka kaba don ha ka tei ka shnong (Mawthir). Hadien ba ka la shah kem la pynhap ia ka hapoh ka jingtohkit kaba 3 sngi ki pulit bad la pynngat ruh ha ka kyndon 506 jong ka Indian Penal Code (IPC) bad la pynkynriah sha Shillong district jail, ka jaka ba ka la iakynduh ia ka kong Agnes. Ka la ioh jamin ha ka 15 tarik u Naiwieng mynta u bnai hadien ba u Majistor na nongstoin u la wan jngoh ia ka.
Ka Kong Paliar ka la iathuh ba ka la leit ban sah sha Mawthir dei na ka daw ba ka kmie jong ka ka la phah ia ka, ka la kynnoh ba hadien ba ka la poi ha Mawthir u bakha jong ka bad u Secretary ka Dorbar shnong kim shym la ai lad ia ka ban rah ia ki khun jong ka bad na itei i daw ki la pynheh da kaba kynnoh ba ka pynkulmar shnong. Ka la kynnoh ruh ba ka shnong Mawthir ka la byrngem ban pyniap bad ban tep ia ka shano shano da kaba ong ba ka dei ka briew kaba na bar shnong.Dei namar ba ka kmie jong ka ka la tieng palat ioh shah pyniap ba ka la kyntu ia ki bor shnong ban aiti ia ka khun jong ka sha ki pulit.
Ka la ong ba naduh ba ki pulit ki la kem ia ka, kam tip shuh haduh mynta shano ki khun jong ka ki don “Naduh ba la kem ia nga ngam tip shuh shano ki khun jong nga ki don” ong ka kong Paliar kaba kdew kti beit ba ka jingshah kem jong ka ka dei na ka daw ba u hynmen jong ka u kwah ban klun ia ka jaka jong ka ha Mawthir.
“Haba la pyllait ia nga, uwei u ophisar pulit na Nongstoin u la kyntu ia ka ba kam dei ban leit phai biang sha ka shnong jong ka namar ka ing jong ka ka la shah thang” ong biang katei ka kong.
Phi don ban ong eiei?