Beh krad ki longkmie ia ki pulit ba ki rung sha shnong briew

Shillong:

Ha ka sngi saitjaiñ jong ka taiew, ki longkmie ha ka shnong Mawkhar, Mission Compound ki la beh krad ia pulit kiba la leit tur sha shnong briew (Mission, Mawkhar). Ki longkmie ki la mih ha ka por ba ki pulit ki la leit rung hapoh kitei ki shnong ban kthong ia ki paidbah kiba ther maw ha ka sngi saitjaiñ.
Hynrei hamar ba ki poi ha Mission Compound bad ha YMCA khrui ki longkmie bad ki thei samla ki la mih ban beh ia ki bad ka la don ka jingiapyni nia kaba la neh shipor bad ki la jem mynsiem noh hadien ba ki pulit ki la kynran dien biang sha Motphran. Kitei ki longkmie ki la maham ia ki pulit ba kim bit ban tur shapoh shnong briew.
Ha katei ka jingiapyni nia ki pulit ki la phah ia ki longkmie ba kin leit noh bad ki la pynsngewthuh ba ki kthong ia ki briew kiba ther maw hynrei kitei ki longkmie kim ailad bad ki la ong ba kam dei ia ki ban leit bad ba katei ka dei ka shnong jong ki, ki ong ba ki dei ki pulit ki ban mih nangtei. Hynrei tang hadien kumba katto katne minit ki pulit ki la siat da ka lyer pynsat khmat ban pynpra ia kitei ki longkmie kiba ia lum lymbung.