Shillong,18 Jymmang: Ka Meghalaya Baby League kan sa sdang lashai ka sngi Saitjain por 3:00 pm ha madan Jawaharlal Nehru Stadium.
Ia kane ka jingialehkai, yn plie da u myntri tnad ialehkai ka jylla u Bah Banteidor Lyngdoh bad yn don lang u Kushal Das u general secretary ka All India Football Federation (AIFF) , u Biswanath Sinha u Zonal Head – East & North East, Tata Trusts, u president ka Meghalaya Football Association (MFA) u bah Larsing M Sawyan, uba long ruh u Vice-President ka AIFF nalor kiwei pat.
Ka jingialehkai sdang kan long hapdeng ka kynhun jong u Eugenson Lyngdoh u nongialehkai ka ri, ka ENE Falcons bad ka JNS Jaguars kaba dei ka kynhun ka JNS Grassroots Centre.
Kiwei ki kynhun ba iashim bynta ha kane ka jingialehkai ki long ka Kickstart Football Academy Rhinos, Touchline NE Cubs, Unified Gorkha Gators, Nongthymmai GC Scorpions, Langsning Greenergy Lions, Nongtrai Cheetahs, Mawlatbah SC Hawks, Littlestar Clouded Leopards, Sunnydale School Doves bad ka Wahlakhiat Bulls.
Ia kane ka jingialehkai, ka Baby League la pyllong da ka jingiasnohkti lang hapdeng ka Tata Trusts, MFA bad ka AIFF da ka jingthmu ban sain dur ia ki khynnah rit ha kane ka jingialehkai kiba hapdeng ka 4 haduh 13 snem.