Jowai: Ki pulit ka West Jaintia Hills lyngba ka kynhun Special Team, hynnin ka miet ki la ioh ban kem ia uwei u eh rang ka NSCN (K) na kawei ka iing sahwai ha shnong Khliehtyrshi, West Jaintia Hills.
Utei u Dy. Secretary ba dei peit ia ka pla tyngka jong ka seng NSCN (K) la tip kyrteng kum u Gaising Maringmei (40 snem) uba ju khot sin kum u Ronal.
Ha ryngkat utei u heh ka NSCN (K), ki pulit ki la iohkem ruh sa ar ngut ki suba dkhot kiba kynthup ia u Khamjang Rongmei (35) bad u Thuanguangpou Kamei ba ju khot sin kum u Benjamin (40) na kajuh ka iing sahwai bad la kurup ia ka pisa kaba 2 lakh tyngka bun tylli ki SIM Cards, ki Mobile Phones bad ki kot ki sla kiba kynthup ia ki shithi dawa pisa jong katei ka seng.