Shillong: Ka ‘lei lieh ka la thlieh ia ka ïng trep jong u myntri rangbah barim ka jylla u Dr.Mukul Sangma, katei ka jingjia ka la jia mynta ka nohphai sngi ha ka por 3:30 baje. Katei ka dei ka ïng trep pynsahnam jong u Dr.Mukul kaba la shna katkum ka rukom shan ïng jong ki Garo ha ki por mynshuwa, ka dei kaba la shna tang da ki dieng, ki siej bad ki traw. Katei ka ïng ka dei kaba don ha ka shnong Gambegre, West Garo hills. La pyntikna ba ka jingpluh katei ka ing ka dei na ka jingshah thlieh ha ka ‘lei lieh da u SP ka West Garo Hills u Dr.MGR Kumar. La iathuh ba ka la don ka jingtied pyrthat bad ka jingthlieh ‘lei lieh kaba jur bha ha kine ki sngi ha ri Lum Garo.
