Shillong: Ka MBOSE ka la pynbna mynta ka sngi ia ka resol Klas XII ha ka Science bad ka Commerce. Na katei ka resol la iohi ba ka St.Anthony’s Higher Secondary ka la lah ban leh bha ha ka Science Stream ha kaba bun ki khynnah pule na katei ka skul ki la lah ban wan ha ka kyrdan First Ten. Ki la don haduh 11 ngut na katei ka skul kiba la wan ha ka kyrdan First ten napdeng ki 12 ngut (don kiba ia kajuh mark). Ha ka Commerce ki la don 7 ngut ki khynnah pule na katei ka skul kiba la wan ha ka kyrdan First Ten napdeng ki 12 ngut kiba la poi sha katei ka kyrdan ( don kiba ia kajuh mark).
Ha baroh ar tylli kitei ki Stream kata Science bad Commerce haba ia kheiñ kyllum ki kynthei ki la kham leh bha ban ia ki shynrang. Ha ka Science Stream ki la don 3724 ngut ki khynnah kiba ia la khun ia ka Eksam kiba la pass ki don 2732 ngut bad haba kheiñ ia ka percentage ka long 76.76%. Ki shynrang kiba la pass ki long 78.27% bad ki kynthei pat 75.43%. Ki don 320 ngut ki bym dei ki khynnah regular bad 49.66% kiba la pass, ki shynrang 41.94% bad ki kynthei 58.27%. Ha ka science ka East Khasi Hills ka la leh bha na baroh ki District bad kiba la pass ki long 82.78% katba ka South Garo hills ka dei kaba tlot tam bad kiba pass ki don tang 16.67%.
Ha ka Commerce ki don 2325 ngut ki khynnah kiba ia leh ia ka eksam hynrei tang 1834 ngut kiba pass bad haba kheiñ ia ka percentage ka long 79.84%. Kiba dei ki khynnah Regular kiba la pass ki long 82.44%. Ki kynthei kiba la pass ki long 88.85% katba ki shynrang 78.27%. Ki bym dei ki Regular kiba la pass ki long 58.73%, ki kynthei 65.08% bad ki shynrang 56.61%. Ka East Garo Hills dei ka District kaba la lah ban leh bha ha ka Commerce kaba la kot sha ka 93.75% katba ka West Jaintia hills pat ka dei kaba kham tlot ki khynnah kiba la pass ki don 61.08%.