Shillong: U MLA ba shah jied dang shen na Williamnagar, u Marcuise N Marak na ka NPP mynta ka sngi u la bam smai kum uwei na ki 59 ngut ki dkhot ka ïing dorbar thawain ka jylla.
U Marcuise N Marak, ka kurim jongu bad ki khun, kiba ia shah shondur lang ha khmat jong ka ophis ka iing dorbar Jylla.
Ia u Marak la pynsmai da u symbud Lamphang ka ïing dorbar thawaiñ, u Timothy D Shira ha kamra treikam jongu ha ïing dorbar barim, kaba don ha Khyndai Lad.
U Marcuise u dei u MLA ba 20 na ka party NPP kaba ialam ia ka sorkar ha ka jylla, u la jop da kaba pynrem ia u kyrtong shimet, u Sengbath Marak u ba wan ba ar bad ia ka MLA barim na ka Congress, ka Deborah C Marak kaba la wan balai.
Ha kane ka jingpynsmai ia u MLA ba thymmai ka Williamnagar, la iadon lang ruh u Myntri Rangbah ka jylla, u Conrad K Sangma, u Myntri kam pohïing, u James K Sangma, u symbud Myntri Rangbah, u Bah Prestone Tynsong ryngkat ki nongkyrshan ka party.
Haba kren hadien ka jingpynsmai, na ka liang u Myntri Rangbah u la ai khublei ia ki nongjied ka Williamnagar namar ka jingshaniah jong ki ha u kytong ka NPP bad kumjuh ia ka sorkar MDA ba la ialap da ka NPP.