Shillong: Haduh mynta don tang uwei u kyrtong uba la pan tiket na ka BJP ban ia khun na Ampati konstitwensi ha ka elekshon shiteng samoi ka ban long ha ka 28 tarik mynta u bnai, utei u dei u juh hi u kyrtong uba la ia khun ha ka elekshon ba dang shu dep u Bakul Ch Hajong.
Haba ia kren bad u Rupang u President ka BJP ha kane ka jylla u bah Shibun Lyngdoh u la ong ba u dang don shabar jylla bad um pat ioh jingtip eiei, hynrei haba ia kren pat bad u Vice President u bah David Kharsati utei ruh u la ong ba u dang ia don sha Bangalore hynrei u bah David u la ong ba haduh mynta ym don nongpan tiket lait noh tang u Bakul Ch Hajong marwei.
U la ong ba kim pat ioh ia pynbeit bha ia ka kam elekshon ha Ampati namarba ki dang ia pynbeit kam shabar jylla. Haba la kylli pat la ka don ne-em ka jingiapynbeit hapdeng ka NPP bad BJP na ka bynta ka elekshon ha Ampati, u bah David u la ong ba haduh mynta kim pat ioh ban ia kren bad ki nongialam ka NPP. Lah ban kdew ba ha ka elekshon ba dang shu dep u Bakul Hajong u la shah rem ha u Dr.Mukul Sangma ka Congress da 8104 vote ha kaba u la ioh tang 8617 vote katba u Dr.Mukul u la ioh 16721 vote.