“U Nathaniel u khyllung, ba dang 6 bnai ha ka iakhih Umsawli”

Shillong,17 Naiwieng:
U Nathaniel Lyngdoh uba ki ju khot ieid u ‘hep ieid’ u dei u khyllung ba dang 6 bnai, u dei u khun shynrang ba ritduh jong ka kong Bermon Lyngdoh, 35 snem karta na ka shnong Maw long –Mawtari.
La iohi ba utei u khyllung u bym pat tip eiei u don hapdeng ka jingkmen bad ka jingphuh samrkhie bad ka peit lyngngoh ia ki briew kiba ia lum khrui ha ka 13tarik mynta u bnai ha Don Bosco Square, wat la ka kmie jong u, ka dang don hapdeng ki jingsngewsih kthang namar ka jingshah pynpra ka ing ka sem jong ki ha Mawtari ha ka tnad Meghalaya Urban Development Society.
Hapdeng ka miet ka kong Bermon ka la bah pynshah khriat ia utei u khun ba dang 6 bnai jong ka ha ka jingiakhih ba ki nongshah pynpra ing jong kitei ki shnong –ka Umsawli bad Mawtari kaba ki la pynlong ha Don Bosco Square naduh ka por mynstep kumba 10 baje eiei. Ka kmie ka la iathuh ba ka la wan sha katei ka jaka ryngkat u khun bad u kpa khun jong ka ha ka por 12 baje mynsngi hynrei kat haduh ba thoh ia kane ka khubor kata ha ka por 7 baje eiei katei ka longkmie ka dang don ha katei ka jaka. Haba la kylli hato kan shong pynshah khriat ia la u khun baroh shimiet, ka kong Bermon ka la ong ‘ngin hap ban shah haduh ban da ioh biang ia ka hok jong ngi’ haba la kylli biang ba katei ka jingshah khriat u khyllung ka lah pynban ba un ioh pang , da ka jingsngewdiaw mynsiem ka la ong ‘Ngam tip shuh ngan leh kumno’. Katei ka longkmie ka la iathuh ba ka don 7 ngut ki khun bad u Nathaniel u dei uba rit duh ka la ialam ryngkat bad ka.
Shuh shuh ha katei ka jaka la iohi ruh sa ia kawei pat ka longkmie kaba dang kynoi thiah ia la i jong i khun iba dang shibnai, ka kong Aisil Lynshing na Mawlong –Mawtari ka la ong ba kam lah ban ieh ia i khun ba dang shibnai sha ing namar ba i dang im tang da ka buin bad ha ka juh ka por ka la ong biang ruh ba kam lah pat ban ieh ne ban shu sngap ia ka jingshah knieh noh bad ka jingshah pynjot ki ing ki sem jong ka namarba mynta ki im khlem ing khlem sem. Katei ka longkmie kaba la don sha ki 30 snem karta ka la iathuh ba ka ma ka ruh ka don 7 ngut ki khun.